एआई युद्धको त्रासदी

अन्तर्राष्ट्रिय

गृहपृष्ठ
अन्तर्राष्ट्रिय

कृत्रिम बुद्धिमत्ता एआई युद्धको त्रासदी

नेपालकभर आइतबार, चैत १, २०८२

काठमाडौं । दक्षिणी इरानको मीनाब सहरस्थित शजारेह तैय्येबेह प्राथमिक विद्यालयमा भएको बम हमलामा कम्तीमा १७० बालिकाको ज्यान गएको छ भने करिब ९५ विद्यार्थी र शिक्षक घाइते भएका छन्। घटना २८ फेब्रुअरी शनिबार बिहान स्थानीय समय अनुसार १०ः४५ बजे भएको बताइएको छ।

उद्धारका लागि पुगेका स्थानीयवासी र टोलीमाथि पनि पुनः बम आक्रमण भएको जनाइएको छ। मारिने अधिकांश बालिका ७ देखि १२ वर्ष उमेर समूहका थिए।

पत्रकारहरूले यसबारे सोध्दा अमेरिकी राष्ट्रपति डोनाल्ड ट्रम्पले उक्त स्थान विद्यालय भएको जानकारी आफूहरूलाई नभएको प्रतिक्रिया दिएका छन्।

रिपोर्टहरूका अनुसार सो क्षेत्रमा पहिले इस्लामिक रेवोलुशनरी गार्ड कोर (IRGC) को सैन्य संरचना रहेको थियो। पछिल्लो समयमा विद्यालय निर्माण भए पनि पुरानो सैन्य डेटा अद्यावधिक नहुँदा एआई प्रणालीले त्यसलाई सैन्य लक्ष्यको रूपमा चिन्हित गरेको आशंका गरिएको छ।

विशेषज्ञहरूले आधुनिक युद्धमा कृत्रिम बुद्धिमत्ता (AI) को प्रयोगले युद्धलाई अझ भयावह बनाएको बताएका छन्। इरान, गाजा र युक्रेनमा प्रयोग भइरहेका एआई प्रणालीहरूले लक्ष्य पहिचानदेखि आक्रमणसम्मको प्रक्रिया स्वचालित रूपमा सञ्चालन गर्ने भएकाले नागरिक सुरक्षामाथि गम्भीर प्रश्न उठेको छ।

अन्तर्राष्ट्रिय मानवअधिकार संस्थाहरूले एआईद्वारा सञ्चालित स्वायत्त हतियार प्रणालीले नागरिक क्षति बढाएको भन्दै यस्ता ‘किलर रोबोट’ प्रविधिमाथि विश्वव्यापी नियन्त्रण आवश्यक भएको बताएका छन्।

प्रकाशित मिति: आइतबार, चैत १, २०८२ १०:२८