संसदका कर्मचारीको माग सम्बोधन गर्न कानूनमन्त्रीको नेतृत्वमा टोली गठन

प्रशासन

गृहपृष्ठ
प्रशासन

संसदका कर्मचारीको माग सम्बोधन गर्न कानूनमन्त्रीको नेतृत्वमा टोली गठन

नेपालकभर आइतबार, असार ९, २०८१

काठमाडौं । संघीय संसद् सचिवालयका कर्मचारीको माग सम्बोधन गर्न कानून, न्याय तथा संसदीय मामिलामन्त्री पदम गिरीको नेतृत्वमा तीन सदस्य टोली गठन भएको छ ।

प्रधानमन्त्रीको सरकारी निवास बालुवाटारमा आइतबार बिहान बसेको प्रधानमन्त्री, सभामुख, राष्ट्रियसभा अध्यक्षसहित शीर्षस्थ नेताहरूको बैठकले आन्दोलनरत कर्मचारीको माग सम्बोधन गर्न कानूनमन्त्री गिरीको नेतृत्वमा संघीय संसद् सचिवालयका महासचिव पद्मप्रसाद पाण्डेय र अर्थसचिव मधुकुमार मरासिनीलाई जिम्मेवारी तोकेको सभामुखको सचिवालयले जनाएको छ ।

प्रधानमन्त्री प्रचण्ड समेतको उपस्थितिमा बसेको बैठकमा सभामुख देवराज घिमिरे, राष्ट्रियसभाका अध्यक्ष नारायणप्रसाद दाहाल, पूर्वप्रधानमन्त्री एवं नेकपा एमालेका अध्यक्ष केपी शर्मा ओली, अर्थमन्त्री वर्षमा पुन र कानूनमन्त्री गिरी सहभागि हुनुहुन्थ्यो । बैठकमा मुख्य सचिव डा. बैकुण्ठ अर्याल र संघीय संसद्का महासचिव पाण्डेय उपस्थित हुनुहुन्थ्यो ।

सभामुख घिमिरेले संसद सचिवालयका कर्मचारीको मागबारे सम्बद्ध पक्षहरूसँग केही दिनदेखि औपचारिक अनौपचारिक छलफल समेत गरिरहेका उहाँको सचिवालयले जनाएको छ ।

प्रकाशित मिति: आइतबार, असार ९, २०८१ ११:१६