रास्वपाका मन्त्रीहरुले मन्त्री क्वाटर छोडे

राजनीति

गृहपृष्ठ
राजनीति

सत्ता सङ्घर्ष रास्वपाका मन्त्रीहरुले मन्त्री क्वाटर छोडे

नेपालकभर सोमबार, असार २४, २०८१

काठमाडौं । रास्वपाका मन्त्रीहरुले मन्त्री क्वाटर छोड्न थालेका छन् । केही मन्त्री क्वाटर छोडेर बाहिरिइसकेका छन् भने केही छोड्ने प्रक्रियामा छन् । युवा तथा खेलकूदमन्त्री विराजभक्त श्रेष्ठले मन्त्री क्वाटर छोड्नु भएको छ । उहाँले विधिवत रूपमा क्वाटर छाडेको जानकारी दिनुभयो ।

उहाँले आफू शुक्रबारबाट मन्त्रालय जान छाडेको र मन्त्रालयसँग सम्बन्धित कामबाहेकमा गाडी र सुरक्षा संयन्त्रको पनि प्रयोग नगर्ने उहाँले बताउनुभयो । ‘आजबाट विधिवत् रुपमा मैले क्वाटर छाडेँ । शुक्रबारबाट मन्त्रालय गएको छैन । गाडी र सुरक्षा संयन्त्र पनि मन्त्रालयको काम परेमात्र प्रयोग गर्छु,’ उहाँले भन्नुभयो ।

उहाँका अनुसार रास्वपाका अन्य मन्त्रीले पनि क्वाटर छाडेको खबर छ । ‘विधिवत् छाड्नुभयो कि भएन मलाई थाहा भएन । तर, सबैले छाडेको भन्ने सुनेको छु । तर, मैले चाहिँ विधिवत रूपमा प्रकृया पुरा गरेर छाडेँ,’ उहाँले भन्नुभयो ।

नेपाली कांग्रेस र नेकपा एमालेले नयाँ गठबन्धन बनाउने निर्णय गरेपछि राजनीतिक तरलता सिर्जना भएको छ । एमालेले सरकार छाडेर समर्थन फिर्ता गरेपछि सरकार स्पष्ट अल्पमतमा छ । जसपाले पनि सरकरलाई दिएको समर्थन फिर्ता लिइसकेको छ ।

यो अवस्थामा रास्वपा मात्र प्रधानमन्त्री प्रचण्डको साथमा उभिएको छ । अल्पमतमा पर्नु भएका प्रचण्डले असार २८ गते विश्वासको मत लिने तयारी गर्नु भएको छ । एमाले भने प्रचण्डलाई राजीनामा दिन तीब्र दबाब दिइरहेको छ ।

प्रकाशित मिति: सोमबार, असार २४, २०८१ १५:३१