वडा सदस्यको खरबुजा खेती, लोभलाग्दो आम्दानी

उद्यम

गृहपृष्ठ
उद्यम

युवाको इलम वडा सदस्यको खरबुजा खेती, लोभलाग्दो आम्दानी सिङ्गापुर र साउदीबाट फर्किएर व्यावसायिक कृषि

नेपालकभर शुक्रबार, वैशाख २१, २०८१

तस्वीर : रासस

नवलपुर । वर्दघाट सुस्तापूर्व नवलपुरको कावासोती-१७ का मीनबहादुर महतोले धान लगाउने खेतमा खरबुजा लगाएर लोभलाग्दो आम्दानी गरिरहनु भएको छ । करिब तीन विघा जग्गा भाडामा लिएर तरकारीखेती गर्दै आउनु भएका उहाँले यसपटक खरबुजा फलाउनुभएको छ । ‘पहिले तरकारी लगाउने गर्थेँ, बजार नपाएपछि खरबुजा लगाएँ । अहिले राम्रो आम्दानी भइरहेको छ’, उहाँले भन्नुभयो ।

वरपर कतै चैतेधान त कतै मकै लगाइएको देखिन्छ । हाल खरबुजा लगाइएको क्षेत्रमा यसअघि करेलाखेती गरेकामा यो पल्ट भने खरबुजा लगाएको महतोले बताउनुभयो । जसबाट उहाँ खुसी हुनुहुन्छ । सरस्वती जातको खरबुजा लगाउनुभएका उहाँले ६० दिनपछि उत्पादन भएको र हालसम्म ८० क्विन्टल हाराहारीमा बिक्री गरिसकेको बताउनुभयो । चैतको पहिलो हप्तादेखि उत्पादन सुरु भएकामा जेठसम्म खरबुजा फल्ने उहाँले बताउनुभयो । यो अवधिमा ६ लाख आम्दानी हुने अनुमान गरेकामा उत्पादन बढेकाले सोचेभन्दा धेरै बिक्री हुने र आम्दानीसमेत बढ्ने उहाँको भनाइ छ ।

उत्पादित खरबुजा विक्री गर्न बजारको पनि समस्या नभएको महतोले बताउनुभयो । जिल्लाको स्थानीय बजारमा खरबुजा खपत हुँदै आएको छ । आफूहरूले कुनै विषादी प्रयोग नगरी उत्पादन गरेकाले बारीबाटै दैनिकजसो दुई क्विन्टल विक्री हुने गरेको उहाँले बताउनुभयो । ‘यसलाई खासै औषधि हाल्नुपरेन, प्राङ्गारिक मल नै धेरै प्रयोग गरियो, उत्पादन पनि सोचेभन्दा धेरै भयो, स्थानीय उत्पादन भनेपछि बारीबाटै किनेर लैजाने धेरै हुन्छन’, उहाँले भन्नुभयो । खरबुजाखेतीमा खासै खर्च र मेहनत गर्नुनपरेको उहाँको भनाइ छ ।

रोजगारीको सिलसिलामा सिङ्गापुर र साउदी अरबमा सात वर्ष बिताउनुभएका महतोले अहिले आफ्नो फार्ममा दैनिक नौ जनालाई रोजगारी दिनुभएको छ । कावासोती नगरपालिका-१७ का वडासदस्यसमेत रहनुभएका उहाँ विगत छ वर्षदेखि व्यावसायिक कृषिमा लाग्नुभएको हो । 'रोजगारीका लागि विदेश नै जानुपर्छ भन्ने छैन । कृषिकर्मबाट पनि कमाउन सकिन्छ', उहाँले भन्नु भएको छ ।

प्रकाशित मिति: शुक्रबार, वैशाख २१, २०८१ ०९:३७