नागरिकता पाउन ८० वर्ष

समाचार

गृहपृष्ठ
समाचार

नागरिकता पाउन ८० वर्ष

नेपालकभर बिहीबार, वैशाख १३, २०८१

तस्वीर:नृपेन्द्रबहादुर मल्ल/रासस

काठमाडौं । मुगु जिल्लाको मुगुम कार्मारोङ गाउँपालिका-५ सेरोग गाउँकी नोन्जोम कामीले ८० वर्षको उमेरमामात्र नागरिकताको प्रमाणपत्र पाउनु भएको छ । विक्रम संवत् २००० साल वैशाख १२ गते जन्मनुभएकी उहाँलाई उहाँको जन्मदिनको अवसर पारेर प्रमुख जिल्ला अधिकारी टोपेन्द्र केसीले नागरिकता प्रमाणपत्र प्रदान गर्नुभएको हो ।

पैतिस वर्षअघि कामीका श्रीमान् सोनाम तेन्जिनको मृत्यु भएको थियो । सदरमुकाम गमगढी पुग्न दुई-तीन दिन हिँड्नुपर्ने भएपछि जान आउन समस्या हुँदा र नागरिकताको आवश्यकताबारे जानकारी नहँुदा त्यसै बसेको उहाँले बताउनुभएको छ । “जब श्रीमान्को मृत्यु भयो घरमा कमाउने मान्छे भएन दुई छोरा पाल्न धौधौ भयो । सरकारले भत्ता दिन्छ भनेर नागरिकता लिन खोज्दा श्रीमान् नहुँदा नागरिकता बनेन,” उहाँले सुनाउनुभयो ।

श्रीमानको नागरिकता, माइती पक्षको सनाखत र नागरिकता पाउनका लागि आवश्यक पर्ने अनुसूचीसहित अन्य कागजात पुगेपछि र ढिला नागरिकता लिनाको कारणबारे विश्वास लाग्दो प्रमाण जुटेपछि उहाँको नागरिकता बनाएको प्रमुख जिल्ला अधिकारी केसीले बताउनुभयो ।

असी वर्षमा पनि नागरिकता नबन्दा सिङ्गो परिवारै राज्यबाट पाउने सेवा सुविधाबाट वञ्चित भएको थियो । विभिन्न सञ्चार माध्यममा उहाँका बारेमा समाचार सार्वजनिक भएपछि स्थानीय समाजसेवी सोनाम लामा कार्मारोङ र वडाध्यक्ष दावा साङवा तामाङले उहाँको नागरिकता बनाउन पहल गर्नुभएको थियो ।

प्रकाशित मिति: बिहीबार, वैशाख १३, २०८१ १०:०८