ठमेलको छाँया सेन्टरमा सुन तस्करीको सेटिङ्, क्यासिनो वाल्डोका प्रबन्धक पक्राउ

समाचार

गृहपृष्ठ
समाचार

अनुसन्धान ठमेलको छाँया सेन्टरमा सुन तस्करीको सेटिङ्, क्यासिनो वाल्डोका प्रबन्धक पक्राउ

नेपालकभर बिहीबार, भदौ २७, २०८१

काठमाडौं । नेपाल इन्भेष्टमेन्ट मेगा बैंकका सञ्चालक पृथ्वीबहादुर पाँडे समूहले ऐतिहासिक कमल पोखरी पुरेर ठड्याएको ठमेलस्थित छाँयासेन्टर सुन तस्करी गर्ने अखडा बनेको रहस्योद्घाटन भएको छ । नेपाल प्रहरीको केन्द्रीय अनुसन्धान व्युरो सीआईबीले ६० किलो सुन तस्करी प्रकरणमा संलग्न चिनियाँ नागरिक टेरेन्स टिएसईलाई छायाँ सेन्टरबाटै पक्राउ गरेसँगै थप रहस्य खुलेको हो ।

सुन तस्करीमा संलग्न चिनिया नागरिक टिएसई छाँया सेन्टरमा सञ्चालित क्यासिनो वाल्डोमा प्रबन्धकका रुपमा कार्यरत थिए । उनी मंगलबार पक्राउ परेका हुन् । सीआईबीका प्रमुख दिपक थापाका अनुसार टिएसईलाई अदालत उपस्थित गराएर बयान सुरु भइसकेको छ ।

सीआईबीको अनुसन्धानमा टिएसई सुन तस्करीमा अन्य चिनियाँ तीस्कर समूहसँग र ६० किलो सुन तस्करी प्रकरणका मुख्य आरोपी याओ पुचिङसँग नियमित सम्पर्कमा देखिएको र सुन तस्करहरु नियमित क्यासिनोमा आउजाउ गरेको भेटिएको छ ।

सुन तस्करीको छानविन गर्न पूर्वन्यायाधीश डिल्लीराज आचार्य नेतृत्वको उच्चस्तरीय जाँचबुझ आयोगले पनि टेरेन्सविरुद्ध अनुसन्धान गरी मुद्दा चलाउन भनी सिफारिस गरेको थियो । अनुसन्धानका क्रममा सीआईबीले क्यासिनोको सीसीटीभी फुटेज समेत बरामद गरेको थियो । छाँया सेन्टरमा रहेको क्यासिनोबाट बरामद सीसीटीभी फुटेजमा सुन तस्करीका मुख्य आरोपीलगायतहरु आउजाउ गरेको देखिएको सीआईबी प्रमुख थापाले जानकारी दिएका छन् ।

सुन तस्करीको अखडा बनेको छाँया सेन्टर पर्ति एवं गुठीको जग्मा मासेर गैरकानूनी रुपमा बनेको भन्दै सर्वोच्च अदालतमा दायर मुद्दा अहिले पनि विचाराधीन छ । छाँया सेन्टरको गैरकानूनी निर्माणविरुद्ध अभियान छेडेका सम्पदा संरक्षणकर्मीहरु सर्वोच्चले छाँया सेन्टर भत्काउने आदेश दिने अपेक्षा गरिरहेका छन् ।

प्रकाशित मिति: बिहीबार, भदौ २७, २०८१ १३:५२