कोशीमा कुर्सीको लडाइँ, हिक्मतकुमार कार्कीको नियुक्तिविरुद्ध सर्वोच्चमा रिट

राजनीति

गृहपृष्ठ
राजनीति

‘सत्ता’ कोशीमा कुर्सीको लडाइँ, हिक्मतकुमार कार्कीको नियुक्तिविरुद्ध सर्वोच्चमा रिट शुक्रबारका लागि तोकियो पेशी

नेपालकभर बिहीबार, वैशाख २७, २०८१

काठमाडौं । कोशी प्रदेशको मुख्यमन्त्रीमा हिक्मतकुमार कार्कीको नियुक्तिविरुद्ध सर्वोच्च अदालतमा रिट दायर भएको छ । निवर्तमान मुख्यमन्त्री केदार कार्कीले आज दायर गरेको रिटमा नयाँ सरकार गठनका लागि प्रदेश प्रमुखले गरेको आह्वान र त्यसका आधारमा भएका निर्णय बदर गर्न माग गरिएको छ ।

साथै उहाँले कार्कीलाई मुख्यमन्त्रीकोे जिम्मेवारी बहाल गर्न अवरोध नगर्न, नगराउन समेत अन्तरिम आदेश माग गर्नु भएको छ । यो रिटको पेशी भोली शुक्रबारका लागि तोकिएको छ ।

यसअघि कोशीको नयाँ मुख्यमन्त्रीमा हिक्मतकुमार कार्कीले आजै बिहान ५२ सांसदको हस्ताक्षरसहित प्रदेश प्रमुख समक्ष आफ्नो दाबी पेश गर्नु भएको थियो । उहाँलाई एमालेका ३९ र माओवादी केन्द्रका १३ सांसदले समर्थन गरेका छन ।

‘संविधानको धारा १६८ (५)बमोजिम कोशी प्रदेश सरकार गठन प्रयोजनका लागि कुल प्रदेशसभा सदस्य सङ्ख्याको बहुमत सदस्यहरूको समर्थन रहेको दाबीसहित सरकार गठन गर्ने सन्दर्भमा भएको आह्वान बमोजिम मेरो नेतृत्वमा कोशी प्रदेश सरकार गठन गर्न बहुमत प्रदेश सभा सदस्यहरूको समर्थन रहेको हुँदा तोकिएको म्यादभित्रै झापा जिल्ला निर्वाचन क्षेत्र नम्बर ५ (१) बाट निर्वाचित प्रदेशसभा सदस्य म हिक्मतकुमार कार्की कोशी प्रदेश सरकारको नेतृत्वका लागि दाबी पेश गरेको छु’, कार्कीले प्रदेश प्रमुख परशुराम खापुङ समक्ष बुझाएको पत्रमा उल्लेख थियो ।

प्रकाशित मिति: बिहीबार, वैशाख २७, २०८१ १६:१९