खोटाङको बुइपा प्रहरी चौकीमा पारदर्शिताको नमुना: सीसी क्यामेरा र पूर्वाधार निर्माणको आयव्यय सार्वजनिक

प्रशासन

गृहपृष्ठ
प्रशासन

खोटाङको बुइपा प्रहरी चौकीमा पारदर्शिताको नमुना: सीसी क्यामेरा र पूर्वाधार निर्माणको आयव्यय सार्वजनिक

प्रमेश ढकाल (खोटाङ संवाददाता) बिहीबार, असार २६, २०८२

खोटाङ। खोटाङको दिक्तेल रूपाकोट मझुवागढी नगरपालिका-१४, बुइपास्थित प्रहरी चौकीले निर्माण गरेको सीसी क्यामेरा र अन्य पूर्वाधारहरूको आयव्यय आज एक पत्रकार सम्मेलनमार्फत सार्वजनिक गरेको छ। प्रहरी चौकी व्यवस्थापन समितिका अध्यक्ष सन्तोष राईले पत्रकार सम्मेलनमा सम्पूर्ण आम्दानी र खर्चको विवरण प्रस्तुत गर्नुभएको हो। २०३६ साल असार ४ गते संखुवासभामा जन्मनुभएका प्रहरी सहायक निरीक्षक डम्बर श्रेष्ठ २०५५ साउन १ गते नेपाल प्रहरीमा आबद्ध हुनुभएको थियो।२०६१ सालमा प्रहरी हवल्दार र २०७० मा प्रहरी सहायक निरीक्षक (असई) हुँदै २०८१ सालमा प्रहरी नायव निरीक्षक (सई) पदमा पदोन्नति हुनुभएका श्रेष्ठ २०८१ असोजमा बुइपा प्रहरी चौकीको प्रमुखका रूपमा सरुवा भई आउनुभएको थियो। उहाँले चौकीको अव्यवस्थित कार्यालय र संरचनाहरूलाई सुधार्ने दृढ संकल्पका साथ काम थाल्नुभएको थियो। सोही क्रममा उहाँले युवा सन्तोष राईको अध्यक्षतामा एक प्रहरी चौकी व्यवस्थापन समिति गठन गरी यस क्षेत्रका बुद्धिजीवीहरूसँगको सहकार्यमा सीसी क्यामेरा, प्रतिक्षालय, गोलघर र कार्यालय व्यवस्थापनलगायतका कार्यहरू अगाडि बढाउनुभएको थियो। यी संरचना र सीसी क्यामेराको गत २०८२ वैशाख २४ गते दिक्तेल रूपाकोट मझुवागढी नगरपालिकाका मेयर तीर्थ भट्टराईको प्रमुख आतिथ्य तथा प्रमुख जिल्ला अधिकारी नरहरि घिमिरे, प्रहरी नायव उपरीक्षक (डीएसपी) प्रत्येक बिष्टलगायतका विशिष्ट अतिथिहरूको उपस्थितिमा समुद्घाटन गरिएको थियो। आजको पत्रकार सम्मेलन कार्यक्रमको उद्घोषक हरि ढकाल हुनुहुन्थ्यो। कार्यक्रममा नेकपा (माओवादी केन्द्र) का प्रतिनिधि गणेश राईले यो कार्यको उच्च प्रशंसा गर्नुभयो। चम्पाती माध्यमिक विद्यालयका प्रधानाध्यापक खगेन्द्र राईले २०५२ सालमा स्थापित यस प्रहरी चौकीमा विभिन्न कार्यालय प्रमुखहरू आए तापनि सई डम्बर श्रेष्ठमा अत्यन्तै दृढ इच्छाशक्ति भएको उल्लेख गर्दै प्रशंसा गर्नुभयो।त्यसैगरी, नेकपा (माओवादी केन्द्र) वडा नम्बर १५ का अध्यक्ष शारदाप्रसाद ढकालले एक मार्मिक कविता वाचन गर्दै यस कार्यको सराहना गर्नुभयो। नेकपा (एमाले) जिल्ला कमिटी सदस्य प्रेम खनालले सीसी क्यामेरा जडानले यस क्षेत्रलाई सुरक्षित बनाउन महत्त्वपूर्ण भूमिका खेलेकोमा धन्यवाद ज्ञापन गर्नुभयो। कार्यक्रमका विशिष्ट अतिथि तथा वडा नम्बर १५ का वडाध्यक्ष राम कटुवालले आगामी दिनमा पनि यस्ता कार्यमा निरन्तर सहयोग गर्ने प्रतिबद्धता व्यक्त गर्नुभयो। आजका प्रमुख अतिथि तथा दिक्तेल रूपाकोट मझुवागढी नगरपालिका-१४ का वडाध्यक्ष दिनेश राईले एक कार्यालय प्रमुखको चाहनाबाट सिंगो समाज सुरक्षित रहन सक्ने र राज्यको मुख ताक्नुभन्दा यस्ता गतिविधिहरूले समाज परिवर्तन गर्न धेरै समय नलाग्ने बताउनुभयो।
आर्थिक विवरण सार्वजनिक प्रहरी चौकी व्यवस्थापन समितिले सार्वजनिक गरेको आर्थिक विवरण अनुसार, सहयोगी दाताहरूबाट कुल रु. १२ लाख ४४ हजार ४६६ उठेको छ। यसमा वडा नम्बर १४ र १५ बाट आगामी आर्थिक वर्षको बजेटबाट रु. २ लाख ११ हजार १११ आउने जानकारी गराइएको छ। हालसम्मको खर्च रु. १० लाख ७ हजार ४९७ रहेको र समितिमा बाँकी रकम रु. २५ हजार ८५८ रहेको जानकारी दिइएको छ। यस सार्वजनिक सुनुवाइले बुइपा प्रहरी चौकीको पारदर्शिता र सामुदायिक सहकार्यको उत्कृष्ट उदाहरण प्रस्तुत गरेको छ।