कांग्रेस नेताहरूको सुझाव : गठबन्धन बलियो बनाउँदै संविधान संशोधनको प्रक्रिया अघि बढाउन सरकारलाई आग्रह

राजनीति

गृहपृष्ठ
राजनीति

संविधान संशोधनको प्रक्रिया अघि बढाउन सरकारलाई आग्रह कांग्रेस नेताहरूको सुझाव : गठबन्धन बलियो बनाउँदै संविधान संशोधनको प्रक्रिया अघि बढाउन सरकारलाई आग्रह संविधान संशोध

नेपालकभर मंगलबार, साउन ७, २०८२

काठमाडौं, साउन — नेपाली कांग्रेसका पूर्वपदाधिकारी तथा वरिष्ठ नेताहरूले वर्तमान कांग्रेस–एमाले गठबन्धनलाई आगामी प्रतिनिधिसभा निर्वाचनसम्म निरन्तरता दिनुपर्ने निष्कर्ष निकाल्दै संविधान संशोधनलगायतका महत्त्वपूर्ण कार्यहरू तत्काल अघि बढाउन सरकारलाई आग्रह गरेका छन्।

आज चाक्सिबारीमा बसेको बैठकपछि सञ्चारकर्मीहरूसँग कुराकानी गर्दै नेता कृष्ण सिटौलाले गठबन्धन सरकारले दुवै दलबीच भएको सहमति अनुसार स्पष्ट कार्ययोजना बनाउँदै अघि बढ्नुपर्नेमा जोड दिए। उनले भने, "यो सरकार नेपाली कांग्रेस र एमालेको संयुक्त प्रतिबद्धताको उपज हो। त्यसैले संविधान संशोधनदेखि सरकारको कार्यशैलीसम्म, सबै कुरामा सहमतिअनुसार काम हुनुपर्छ।"

सिटौलाका अनुसार संविधान कार्यान्वयनको समीक्षा र आवश्यक संशोधनका लागि गठबन्धनको साझा प्रतिबद्धता भए पनि त्यो कार्य हालसम्म अघि नबढेकोप्रति चिन्ता व्यक्त गरिएको छ। "सरकारको नीति तथा कार्यक्रममै यो विषय उल्लेख गरिएको छ। तर, कार्यान्वयनमा आलटाल भइरहेको छ, यसलाई अब प्राथमिकता दिनुपर्छ," उनले स्पष्ट पारे।

बैठकमा सहभागी नेताहरूले सरकारलाई परिणाममुखी बन्न आग्रह गर्दै राष्ट्रिय हितका मुद्दामा स्पष्ट र एकढिक्का नीति ल्याउन पनि सुझाव दिएका छन्। उनीहरूले शान्ति, स्थायित्व र विकासका लागि अहिलेको गठबन्धनलाई मजबुत बनाउँदै लैजानुपर्नेमा जोड दिएका छन्।

बैठकमा पूर्वमहामन्त्री प्रकाशमान सिंह, पूर्वउपसभापति रामचन्द्र पौडेल समर्थक नेताहरू, पूर्वमन्त्रीहरूलगायतको उपस्थिति रहेको थियो। उनीहरूले आन्तरिक पार्टी एकता र सरकारले पूरा गर्नुपर्ने कार्यसूचीबारे पनि व्यापक छलफल गरेका थिए।

सरकारको स्थायित्व र संविधानको प्रभावकारी कार्यान्वयनका लागि आगामी दिनहरूमा थप संवाद र समन्वय आवश्यक रहेको निष्कर्ष बैठकले निकालेको छ।

प्रकाशित मिति: मंगलबार, साउन ७, २०८२ ०६:१२