डडेल्धुराको चुरे क्षेत्रमा सुदूरपश्चिमकै ठूलो ड्र्यागन फलको बगैँचा स्थापना

उद्यम

गृहपृष्ठ
उद्यम

ड्र्यागन फल (सिउँडीफल) को बगैँचा डडेल्धुराको चुरे क्षेत्रमा सुदूरपश्चिमकै ठूलो ड्र्यागन फलको बगैँचा स्थापना ड्र्यागन फलको बगैँचा स्थापना

नेपालकभर शनिबार, साउन ११, २०८२

डडेल्धुरा, साउन – सुदूरपश्चिम प्रदेशको डडेल्धुरा जिल्लाको चुरे पर्वत क्षेत्रमा प्रदेशकै सबैभन्दा ठूलो ड्र्यागन फल (सिउँडीफल) को बगैँचा स्थापना गरिएको छ।

डडेल्धुराको आलिताल गाउँपालिका–४ स्थित चुडापानीमा रहेको बाँझो जमिनमा ५ सयभन्दा बढी ड्र्यागन फलका बिरुवा रोपिएको हो। यस बगैँचाको सुरुवात स्थानीय कृषक कर्णबहादुर बोहोराले गरेका हुन्। उनले यसअघि जालटुडामा २ सय बिरुवाबाट खेती सुरु गरेका थिए। डेढ वर्षमै सफल फलफूल उत्पादन भएपछि उनले यस वर्ष थप बिरुवा रोपेका हुन्।

बगैँचा स्थापना गर्न करिब १० लाख रुपैयाँ लागत लागेको छ। कृषि ज्ञान केन्द्र डडेल्धुराले बोहोरालाई करिब ३ लाख ६२ हजार रुपैयाँ बराबरको बिरुवा, थाँक्रा, मल लगायतका सामग्री सहयोग गरेको जानकारी दिएको छ।

केन्द्रका प्रमुख नरेन्द्र पनेरूका अनुसार यो बगैँचा पहाडी जिल्लामै नमुना र व्यावसायिक मोडेलको रूपमा विकास हुने अपेक्षा गरिएको छ। पनेरूले ड्र्यागन फलको माग उच्च रहेको र आगामी दिनमा अन्य जिल्लाहरूमा निर्यात गर्ने योजना पनि रहेको बताए।

कृषक बोहोराका अनुसार गत वर्ष मात्रै उनका बिरुवाबाट २० क्विन्टल फल उत्पादन भएको थियो। एक बोटबाट वार्षिक २० किलोसम्म फल उत्पादन हुने र प्रति दाना फलको तौल करिब ५ सय ग्रामसम्म हुने जानकारी दिएका छन्।

यस बगैँचाले डडेल्धुरा लगायत सुदूरपश्चिमका अन्य स्थानहरूमा वैकल्पिक नगदे बालीको सम्भावना बढाएको कृषक र विज्ञहरूको भनाइ छ।

प्रकाशित मिति: शनिबार, साउन ११, २०८२ १३:३७