चितवन, साउन — चितवनको भरतपुर र नवलपुरको गैँडाकोटलाई जोड्ने अत्याधुनिक ‘सिग्नेचर ब्रिज’को निर्माण कार्य अझै प्रारम्भ हुन सकेको छैन । पुलको निर्माणका लागि २०७८ सालमै प्रक्रिया सुरु भए पनि ठेक्का लिएको कम्पनी तुँदी कन्स्ट्रक्सन प्रालिले २७ महिनासम्म पनि डिजाइन पेश गर्न सकेको छैन ।
४८ महिनाभित्र पुल निर्माण सम्पन्न गर्ने लक्ष्यसहित १ अर्ब ६८ करोड ७६ लाख रुपैयाँमा ठेक्का सम्झौता गरिएकोमा, १२ महिनाभित्र डिजाइन तयार गर्ने सर्त थियो । तर, हालसम्म पनि कम्पनीले सडक विभागमा डिजाइन बुझाएको छैन ।
पुलको शिलान्यास तत्कालीन प्रधानमन्त्री पुष्पकमल दाहाल ‘प्रचण्ड’ले २०८१ वैशाख ३१ गते गरेका थिए । तर, शिलान्यास भएको एक वर्ष बितिसक्दा समेत कामको थालनी हुन नसक्दा आयोजना थप अन्योलमा परेको छ ।
अत्याधुनिक डिजाइन, चिनियाँ प्राध्यापकको रिभ्यू
सडक डिभिजन कार्यालय भरतपुरका इन्जिनियर अर्जुन घिमिरेका अनुसार पुलको डिजाइन निकै जटिल भएकोले ढिलाइ भएको हो । पुल ‘डलब पाइलन केबल स्टेड ब्रिज’ शैलीमा निर्माण गरिनेछ, जसको डिजाइन चीनको टोन्जी विश्वविद्यालयका प्रा. डा. देवेई चेनले रिभ्यू गरिरहेका छन् ।
‘साउनको अन्तिमसम्म डिजाइन पेस गर्ने जानकारी कम्पनीले दिएको छ,’ इन्जिनियर घिमिरेले भने, ‘पुल निकै आकर्षक बन्नेछ र त्यसैले अलि समय लागेको हो ।’
सडक विभाग पुल महाशाखा प्रमुख ललिजन खनालले पनि अबको केही दिनमै डिजाइन पेस हुने बताउँदै भने, ‘हामीले कम्पनीलाई साउनभित्रै डिजाइन नपेस गरे ठेक्का रद्द गर्ने चेतावनी दिएका छौं । अहिले रिभ्यूको अन्तिम चरणमा पुगेको छ, भदौभित्र हामीले डिजाइन पास गरिसक्नेछौं ।’
४४ वर्ष पुरानो पुल विस्थापित गर्दै नयाँ संरचना
नारायणी नदीमा हाल सञ्चालनमा रहेको पुल करिब ४४ वर्ष पुरानो भइसकेको छ । २०३८ सालमा बनेको उक्त पुल जीर्ण भइसकेको हुँदा सिग्नेचर ब्रिज अत्यावश्यक मानिएको हो । नयाँ पुल पूर्व–पश्चिम राजमार्गमा पर्नेछ र यसले भरतपुर महानगरपालिका र गैँडाकोट नगरपालिकालाई थप मजबुत रूपमा जोड्नेछ ।
अब कहिले सुरु हुन्छ काम ?
सडक विभागका अनुसार साउनको अन्तिमसम्म डिजाइन पेस भएपछि भदौ महिनाभित्र स्वीकृति दिने प्रक्रिया सकिनेछ । त्यसपछि निर्माण कार्य औपचारिक रूपमा सुरु हुनेछ । बजेटको कुनै अभाव नरहेकाले निर्माण कार्यलाई तीव्र रूपमा अघि बढाइने विभागको भनाइ छ ।
मुख्य तथ्यहरू:
-
ठेक्का सम्झौता: २०८० वैशाख, तुँदी कन्स्ट्रक्सन
-
कुल लागत: १ अर्ब ६८ करोड ७६ लाख रुपैयाँ
-
निर्माण अवधि: ४८ महिना (१२ महिना डिजाइन + ३६ महिना निर्माण)
-
पुलको लम्बाइ: ४२० मिटर
-
प्रकार: डलब पाइलन केबल स्टेड ब्रिज
-
हालको स्थिति: डिजाइन रिभ्यूको अन्तिम चरणमा
