माओवादी केन्द्रको स्थायी समिति बैठक ,सर्बाधिक चासो

राजनीति

गृहपृष्ठ
राजनीति

स्थायी समितिको बैठक माओवादी केन्द्रको स्थायी समिति बैठक ,सर्बाधिक चासो पार्टीको आन्तरिक विमति गहिरिँदै गएको अवस्थामा स्थायी समिति बैठक

नेपालकभर शनिबार, साउन १८, २०८२

काठमाडौँ, नेकपा (माओवादी केन्द्र)को स्थायी समितिको बैठक पार्टीको केन्द्रीय कार्यालय पेरिसडाँडामा सुरु भएको छ। हिजो बिहान ११ बजेदेखि सुरु भएको बैठकमा अध्यक्ष पुष्पकमल दाहाल ‘प्रचण्ड’ले राजनीतिक प्रस्ताव प्रस्तुत गरेसँगै नेताहरूले आ-आफ्नो धारणा राख्न थालेका छन्।

पार्टीका उपमहासचिव हरिबोल गजुरेलका अनुसार अध्यक्षले राखेको प्रस्तावमाथि गहन छलफल सुरु गरिएको छ। प्रत्येक स्थायी समिति सदस्यलाई विचार राख्नका लागि १० देखि १५ मिनेटको समय तोकिएको छ। यद्यपि, आवश्यकताअनुसार समय थपिन सक्ने र छलफल लम्बिन सक्ने सम्भावना पनि रहेको उनले जनाए।

बैठक कति दिन चल्ने भन्ने कुनै म्याद तोकिएको छैन। गजुरेलका अनुसार, सदस्यहरूका विचार र सुझावको आधारमा मात्र निष्कर्षमा पुगिनेछ। "कसैलाई अहिले नै स्पष्टीकरण सोध्ने वा निर्णयमा पुग्ने भन्ने उद्देश्य होइन," उनले भने, "सबैको मत सुनिएपछि मात्रै के गर्ने भन्ने टुंगो लाग्नेछ।"

यसअघि अध्यक्ष प्रचण्ड र उपमहासचिव जनार्दन शर्माबीच देखिएको मतभेद सार्वजनिक रुपमा आएका कारण यो बैठकप्रति व्यापक चासो देखिएको छ। पार्टीभित्रको शक्ति सन्तुलन र नेतृत्वको भूमिकालाई लिएर उठेका प्रश्नहरूमध्ये केहीको समाधान यस बैठकबाट खोजिने अनुमान गरिएको छ।

बैठकमा प्रस्तुत गरिएको प्रस्तावमा पार्टीको सांगठनिक अवस्था, आगामी राजनीतिक कार्यदिशा, सरकारमा सहभागिता, र जनवर्गीय संगठनहरूको सक्रियता जस्ता विषय समावेश गरिएको स्रोतहरूले जनाएका छन्। नेताहरूको धारणा तथा तिनका बीच हुने बहसको स्वरूपले बैठकको गम्भीरता झल्काउने अपेक्षा गरिएको छ।

पार्टीभित्र बढ्दो असहमति र नेतृत्वस्तरको तनावबीच सुरु भएको यो बैठकले माओवादी केन्द्रको भावी मार्गचित्र र नेतृत्व सन्तुलनमा निर्णायक असर पार्ने विश्वास गरिएको छ।

प्रकाशित मिति: शनिबार, साउन १८, २०८२ ०८:०८