थिमीमा यो वर्ष पनि वीरेन्द्रभक्तले नै जिब्रो छेड्ने

समाज

गृहपृष्ठ
समाज

परम्परा थिमीमा यो वर्ष पनि वीरेन्द्रभक्तले नै जिब्रो छेड्ने जिब्रो छेड्ने

नेपालकभर सोमबार, साउन २०, २०८२

काठमाडौं-मध्यपुर थिमी नगरपालिका–४ बालकुमारी निवासी वीरेन्द्रभक्त श्रेष्ठले यस वर्ष पनि जिब्रो छेड्ने परम्परालाई निरन्तरता दिने भएका छन्। भाद्र शुक्ल पूर्णिमाको साँझ दिगु भैरव मन्दिरमा फलामको सियोले जिब्रो छेडेर महादीप बोकेर पशुपतिनाथसम्म यात्रा गर्ने प्रचलन अनुसार श्रेष्ठले यो विशिष्ट र दुर्लभ जात्रामा सहभागी हुने पक्का भएको हो।

यस वर्ष भाद्र शुक्ल पूर्णिमा भदौ २२ गते परेको छ। उक्त दिन साँझ, तेलमा डुबाइएको करिब एक फिट लामो फलामको सियो विशेष विधिपूर्वक पूजा गरेर श्रेष्ठको जिब्रो छेडिनेछ। त्यसपछि उनले महादीप बोकेर थिमीबाट पशुपतिनाथसम्मको यात्रा तय गर्ने र अन्त्यमा पुनः बालकुमारी मन्दिरमै सियो निकालिनेछ।

जिब्रो छेड्ने यो जात्रा केही समय स्थगित भए पनि २०६३ सालपछि ११ वर्षको अन्तरालमा २०७४ सालमा पुनः सुरु गरिएको थियो। त्यसयता २०७९ र २०८१ सालमा पनि वीरेन्द्रभक्तले नै जिब्रो छेडेका थिए। २०७५ सालमा भने बालकराम श्रेष्ठले यो परम्परा निभाएका थिए। त्यसअघि कृष्ण नानिचा श्रेष्ठले २०५२, २०५७ र २०६३ सालमा यो कर्तव्य निर्वाह गरेका थिए।

जात्रा संरक्षण समिति संयोजक अर्जुन श्रेष्ठका अनुसार यो परम्परा सञ्चालन गर्न रु पाँच लाखभन्दा बढी खर्च हुने गरेको छ। नगरपालिकाले सहयोग गरे पनि प्रमुख आर्थिक बोझ जिब्रो छेड्ने व्यक्तिले नै व्यहोर्नुपर्ने उल्लेख गरिएको छ।

स्थानीय विश्वास अनुसार, यो जात्रा सम्पन्न गरेपछि नगरमा रोग, अनिकाल, र प्राकृतिक विपत्ति टर्छन्। धार्मिक, सांस्कृतिक तथा ऐतिहासिक महत्व बोकेको यस जात्राले मध्यपुर थिमीको सांस्कृतिक पहिचान झनै मजबुत बनाउँदै आएको छ।

प्रकाशित मिति: सोमबार, साउन २०, २०८२ ०७:५४