म्याग्दीको ढोल्ठानबाट देखिएको धौलागिरि हिमशृङ्खलाको अनुपम दृश्यले पर्यटक लोभ्याउन थाले

पर्यटन

गृहपृष्ठ
पर्यटन

धौलागिरि हिमशृङ्खलाको अनुपम दृश्य म्याग्दीको ढोल्ठानबाट देखिएको धौलागिरि हिमशृङ्खलाको अनुपम दृश्यले पर्यटक लोभ्याउन थाले पर्यटक लोभ्याउन थाले

नेपालकभर बुधबार, साउन २२, २०८२

म्याग्दी, बेनी — म्याग्दी जिल्लाको बेनी नगरपालिका–९ स्थित ढोल्ठानबाट देखिने धौलागिरि हिमालसहितका अन्य हिमशृङ्खलाको दृश्यले हालैका दिनमा स्थानीय तथा आन्तरिक पर्यटकको ध्यान आकर्षित गर्न थालेको छ।

समुद्र सतहबाट झन्डै २,००० मिटर उचाइमा अवस्थित ढोल्ठानबाट मौसम खुलेको दिन धौलागिरि (८,१६७ मि) सहित अन्नपूर्ण, नीलगिरी, तुकुचे, मनापाथी लगायतका हिमालहरू एकैसाथ अवलोकन गर्न सकिन्छ। यस स्थानबाट देखिने सूर्योदय र साँझतिरको सुनौलो हिमालको दृश्यले पर्यटकमा विशेष आकर्षण थपेको छ।

स्थानीय बासिन्दाका अनुसार, ढोल्ठान क्षेत्र विगतदेखि नै प्राकृतिक सौन्दर्यले भरिपूर्ण भए पनि हालका दिनमा सामाजिक सञ्जालमार्फत यसको प्रचार–प्रसार बढेसँगै यहाँ पुग्ने पर्यटकको सङ्ख्या बढ्दै गएको हो।

"ढोल्ठानबाट देखिने हिमालहरूको दृश्य कुनै पनि भ्यूपइन्टभन्दा कम छैन," स्थानीय युवा सन्तोष पुनले बताए, "अब यहाँ भौतिक पूर्वाधार विस्तार गरेमा पर्यटन प्रवर्द्धनमा ठूलो योगदान पुग्न सक्छ।"

स्थानीय तहले समेत ढोल्ठानलाई आन्तरिक पर्यटन प्रवर्द्धनका लागि प्राथमिकतामा राख्ने तयारी गरेको जनाएको छ। बेनी नगरपालिकाका अनुसार आगामी वर्षको योजनामा यो क्षेत्रको पहुँच मार्ग सुधार र भ्यू टावर निर्माण समावेश गरिएको छ।

धौलागिरि पदमार्ग, मुस्ताङ, र अन्नपूर्ण क्षेत्रमा जाने पर्यटकका लागि ढोल्ठान एक आकर्षक 'साइड डेस्टिनेशन' बन्न सक्ने सम्भावना देखिएको छ।

प्रकाशित मिति: बुधबार, साउन २२, २०८२ १२:१३