घानामा हेलिकप्टर दुर्घटनामा दुई मन्त्रीसहित आठ जनाको मृत्यु, देशभर शोक

विविध

गृहपृष्ठ
विविध

हेलिकप्टर दुर्घटना घानामा हेलिकप्टर दुर्घटनामा दुई मन्त्रीसहित आठ जनाको मृत्यु, देशभर शोक देशभर शोक

नेपालकभर बिहीबार, साउन २३, २०८२

घाना, साउन २२-अफ्रिकी राष्ट्र घानामा बुधबार बिहान भएको एक दुखद हेलिकप्टर दुर्घटनामा दुई मन्त्रीसहित आठ जनाको मृत्यु भएको छ। रक्षामन्त्री एडवर्ड ओमाने बोमाह र वातावरणमन्त्री इब्राहिम मुर्तला मोहम्मदको ज्यान गएपछि देशभर शोकको छायाँ छाएको छ।

दुर्घटनामा कार्यवाहक उप-राष्ट्रिय सुरक्षा संयोजक अल्हाजी मोहम्मद मुनिरु लिमुना, राष्ट्रिय प्रजातान्त्रिक कांग्रेस (एनडीसी) का उपाध्यक्ष शमूएल सारपोङ र पूर्व संसदीय उम्मेदवार शमूएल अबोआगे पनि ज्यान गुमाएका छन्।

घानाको सेनाका अनुसार हेलिकप्टरमा पाँच यात्रु र तीन चालक दलका सदस्य सवार थिए। राजधानी आक्राबाट बिहान ९:१२ बजे उडेको हेलिकप्टर सुन खानी क्षेत्र ओबुआसीतर्फ जाँदै गर्दा अचानक सम्पर्कविहीन भएको थियो। त्यसपछि हेलिकप्टर राडारबाट हराएको थियो।

राष्ट्रपति कार्यालयले दुर्घटनालाई "राष्ट्रिय त्रासदी" घोषित गर्दै देशभर शोकको घोषणा गरेको छ। राष्ट्रपति जोन महामाका प्रमुख निजी सचिव जुलियस डेब्राले पत्रकार सम्मेलनमार्फत देशभर सार्वजनिक कार्यालयमा झण्डा आधा झुकाउने निर्णय सुनाएका छन्।

दुर्घटनाको कारणबारे हालसम्म स्पष्ट नभए पनि प्रारम्भिक अनुसन्धान सुरु भएको अधिकारीहरूले जनाएका छन्। दुर्घटनाग्रस्त हेलिकप्टर Z-9 मोडेलको उपयोगिता हेलिकप्टर भएको र यो सामान्यतः यातायात तथा आपतकालीन सेवाका लागि प्रयोग गरिँदै आएको बताइएको छ।

घानाली सरकार तथा सत्तारूढ एनडीसी पार्टीले दुर्घटनामा ज्यान गुमाउनेप्रति गहिरो शोक व्यक्त गर्दै राष्ट्रले अपूरणीय क्षति बेहोर्नु परेको प्रतिक्रिया दिएका छन्।

प्रकाशित मिति: बिहीबार, साउन २३, २०८२ ०९:०३