कांग्रेसको टिप्पणी-‘मार्शल लगाएर घेराबन्दी गरी विश्वासको मत लिएको पहिलो घटना’

राजनीति

गृहपृष्ठ
राजनीति

कांग्रेसको टिप्पणी-‘मार्शल लगाएर घेराबन्दी गरी विश्वासको मत लिएको पहिलो घटना’

नेपालकभर सोमबार, जेठ ७, २०८१

काठमाडौं । प्रमुख प्रतिपक्षी कांग्रेसले संसदमा आफुहरुलाई मार्शल लगाई घेर्न लगाएर प्रधानमन्त्रीले जबरजस्ती विश्वासको मत लिएको आरोप लगाएको छ । कांग्रेससहित विपक्षीहरुको नाराबाजीबीच संसद्मा कडा सुरक्षा व्यवस्थासहित प्रधानमन्त्री प्रचण्डले विश्वासको मत लिएको भन्दै कांग्रेसले लोकतन्त्रमा यस्तो हुनु दुर्भाग्य भएको आरोप लगाएको हो ।

कांग्रेसका केही सांसदहरुले सञ्चारकर्मीसँग प्रतिक्रिया दिँदै विपक्षी दलको विरोधबीच प्रधानमन्त्री प्रचण्डले मार्शल लगाएर विश्वासको मत लिएको बताए । कांग्रेसले सहकारी प्रकरणमा गृहमन्त्री रवि लामिछानेको संलग्नता रहेको आरोप लगाउँदै छानबिन समिति गठनको माग गर्दै आएको छ ।

विरोधमा उत्रिएको कांग्रेसलाई मार्शल लगाएर घेराबन्दीमा राख्दै प्रधानमन्त्रीले विश्वासको मत लिने प्रक्रिया अघि बढाएकामा सभामुख देवराज घिमिरेको पनि विपक्षीले आलोचना गरेका छन् । विपक्षलाई मार्शल लगाएर प्रधानमन्त्रीले विश्वासको मत लिएको यो संसदीय इतिहासमा पहिलोपटक भएको हुन सक्ने विपक्षी सांसदहरुको टिप्पणी छ ।

प्रधानमन्त्री प्रचण्डले भने कांग्रेसको विरोधप्रति चर्को टिप्पणी गर्दै चर्को मूल्य चुकाउनुपर्ने चेतावनी दिनु भएको छ । ‘आज बहुत गलत गर्नुभयो,’ उहाँले भन्नुभयो, ‘यो प्रधानमन्त्रीलाई विश्वासको मत लिन नदिएर इतिहासमा नराम्रो उदाहरण प्रस्तुत गर्नुभयो । गहिरो दुःख व्यक्त गर्छु । कांग्रेसलाई चर्को मूल्य पर्नेछ ।’

प्रकाशित मिति: सोमबार, जेठ ७, २०८१ १३:५४