आफ्नो पक्राउ पुर्जी रोक्न सिरोहिया सर्वोच्चको शरणमा

समाचार

गृहपृष्ठ
समाचार

आफ्नो पक्राउ पुर्जी रोक्न सिरोहिया सर्वोच्चको शरणमा

नेपालकभर मंगलबार, जेठ ८, २०८१

काठमाडौं । कान्तिपुर मीडिया ग्रुपका अध्यक्ष कैलाश सिरोहिया आफूविरुद्ध जारी पक्राउ पुर्जीविरुद्धको रिट निवेदन लिएर सर्वोच्च अदालत पुग्नु भएको छ । जिल्ला अदालत धनुषाले मंगलबार पक्राउ पुर्जी जारी गरेपछि त्यसविरुद्ध सिरोहियाले सर्वोच्चमा रिट हालेको सर्वोच्चका सह प्रवक्ता गोविन्द घिमिरेले बताउनुभयो ।

सिरोहियाविरुद्ध जिल्ला प्रहरी कार्यालय धनुषामा दोहोरो नागरिकता लिएको आरोपमा जाहेरी दर्ता भएको थियो । यो नागरिकता प्रकरणमा अनुसन्धानका लागि भन्दै प्रहरीले जिल्ला अदालतमा पक्राउ पुर्जी माग गरेको थियो । प्रहरीको अनुरोधपछि जिल्ला अदालतले पुर्जी जारी गरेपछि त्यसलाई रोक्न सिरोहियाले सर्वोच्चमा रिट हाल्नु भएको हो ।

रिटमा कारण देखाऊ आदेश समेत भइसकेको अवस्थामा पक्राउ पुर्जी जारी गरिएको र पक्राउ पुर्जी जारी हुनुपर्ने कारण नै नभएको जिकिर रिटमा गरिएको छ । रिटमा उक्त पक्राउ पुर्जी असंवैधानिक भएकाले अन्तरिम आदेश मार्फत रोकिनुपर्ने माग गरिएको छ ।

रिटको पेशी वुधबारका लागि तोकिएको छ । आफ्नो नागरिकता छानबिनका लागि आफू तयार नै रहेको तर अहिले आफू संलग्न सञ्चार माध्यम र प्रेस स्वतन्त्रतालाई चुनौती दिन यस्तो गरिएको जिकिर सिरोहियाले गर्नु भएको छ ।

प्रकाशित मिति: मंगलबार, जेठ ८, २०८१ १७:२८