केयूमा सूचना प्रविधि केन्द्र स्थापना

विज्ञान/प्रविधि

गृहपृष्ठ
विज्ञान/प्रविधि

सूचना प्रविधि केयूमा सूचना प्रविधि केन्द्र स्थापना

नेपालकभर सोमबार, कात्तिक ४, २०८२

काभ्रेपलाञ्चोक, ३ कात्तिक।

धुलिखेलस्थित काठमाडौँ विश्वविद्यालय (केयू)मा सूचना प्रविधि केन्द्र स्थापना गरिएको छ । केन्द्र नेपालको अनुसन्धान, नवप्रवर्तन र डिजिटल स्थायित्व प्रवद्र्धन गर्ने अपेक्षा लिइएकोे छ ।

विश्वविद्यालयले उक्त केन्द्रसँगै मोवाइल एप ‘केयु–कनेक्ट’समेत सञ्चालनमा ल्याएको छ । उक्त केन्द्रमा जटिल अनुसन्धानका लागि ‘सुपरकम्प्युटिङ क्लस्टर’ सञ्चालन गर्न, राष्ट्रिय एआई नीति कार्यान्वयन, स्थानीय डेटा प्रयोग गरेर अनुसन्धान र नैतिक रुपरेखा विकास गर्न तथा भूकम्प, महामारी, बाढीजस्ता आपतकालीन अवस्थामा सहयोग–प्रणाली विकास गर्ने विश्वविद्यालयका उपकुलपति प्राडा अच्युत वाग्लेले जानकारी दिनुभयो ।

उहाँका अनुसार विश्वविद्यालयले स्थापना गरेको मोबाइल एप ‘केयु कनेक्ट’ले विद्यार्थीलाई शैक्षिक, प्रशासनिक र क्याम्पससम्वन्धी जानकारीमा सहज पहुँच प्रदान गर्ने छ । यस्तै विश्वविद्यालयको मोबाइल एपमा विद्यार्थी प्रोफाइल व्यवस्थापन, सूचना र सूचनापत्रमा तत्कालै पहुँच पुग्नुका साथै विश्वविद्यालयका समाचार, परीक्षा परिणाम तथा कार्यक्रम, पठनपाठनसम्बन्धी विवरण, कोर्स सूची, शुल्क विवरण, भुक्तानी रेकर्ड, प्रमाणपत्र तथा प्रतिलिपि अनुरोधलगायतका सेवा उपलब्ध गराइएको छ । उहाँले भन्नुभयो, “उक्त एपले विश्वविद्यालयसँग प्रत्यक्ष एकीकृत भएर कोठा, आरक्षण, स्रोत व्यवस्थापन तथा कक्षा तालिकालगायतका विषयमा सहजता ल्याउने छ ।”

प्रकाशित मिति: सोमबार, कात्तिक ४, २०८२ १३:१९