पदयात्रामा जानुअघि मौसमबारे जानकारी लिन सरकारको आग्रह

वातावरण

गृहपृष्ठ
वातावरण

सरकारको आग्रह पदयात्रामा जानुअघि मौसमबारे जानकारी लिन सरकारको आग्रह सरकारको आग्रह

नेपालकभर सोमबार, कात्तिक ११, २०८२

काठमाडौं । सरकारले हिमाली तथा उच्च पहाडी क्षेत्रतर्फ पदयात्रा वा भ्रमणमा निस्कनुअघि मौसमबारे सावधानी अपनाउन आग्रह गरेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले जल तथा मौसम विज्ञान विभागबाट जारी हुने मौसम पूर्वानुमानका सूचना र चेतावनी (‘अलर्ट’) का बारेमा अवश्य जानकारी लिएर मात्र यात्रा थाल्न अनुरोध गरेको हो।

प्राधिकरणका अनुसार हालको मौसम परिवर्तनशील अवस्थाका कारण हिमाली क्षेत्रहरूमा आकस्मिक हिमपात, हावा तथा वर्षाको सम्भावना रहने भएकाले यात्रुहरूलाई विशेष सतर्कता अपनाउन आग्रह गरिएको छ।

यस्तै, प्राधिकरणले पदयात्रामा निस्कनुअघि पर्याप्त तयारी गर्न, आवश्यक औषधि र सामाग्री साथमा लैजान, लेक लाग्ने जोखिमबारे जानकारी प्राप्त गर्न तथा स्वास्थ्य असहज महसुस भएमा तुरुन्तै तलतिर झरेर उपचार प्रक्रियामा लाग्न सुझाव दिएको छ। साथै, एक्लै पदयात्रामा ननिस्कन र समूहमा रहेर यात्रा गर्न पनि अनुरोध गरिएको छ।

पछिल्ला दुई दिन (कात्तिक ८ र ९ गते) लेक लागेर मनाङ र कास्कीमा गरी चार जनाको मृत्यु भएको छ भने एक जना स्पेनी नागरिकलाई उपचारका लागि काठमाडौँ ल्याइएको छ।

लेक लागेर ज्यान गुमाउनेप्रति प्राधिकरणले गहिरो दुःख व्यक्त गर्दै भावपूर्ण श्रद्धाञ्जली अर्पण गरेको छ। साथै, मृतकका परिवारजनप्रति समवेदना प्रकट गर्दै बिरामीहरूको शीघ्र स्वास्थ्यलाभको कामना गरिएको विज्ञप्तिमा प्राधिकरणकी प्रवक्ता शान्ति महतले जनाएका छन्।

प्रकाशित मिति: सोमबार, कात्तिक ११, २०८२ ०७:२२