प्रधानमन्त्रीको सचिवालयको स्पष्टिकरणः मन्त्री नियुक्ति–हटाउने अधिकार प्रधानमन्त्रीकै अधिकारक्षेत्रमा

राजनीति

गृहपृष्ठ
राजनीति

समाचार सार्वजनिक प्रधानमन्त्रीको सचिवालयको स्पष्टिकरणः मन्त्री नियुक्ति–हटाउने अधिकार प्रधानमन्त्रीकै अधिकारक्षेत्रमा

नेपालकभर बिहीबार, कात्तिक १४, २०८२

काठमाडौं । काठमाडौं महानगरपालिकाका मेयर बालेन्द्र साह (बालेन) ले गृहमन्त्री ओमप्रकाश अर्याललाई हटाउन दबाव दिएको समाचार सार्वजनिक भएपछि प्रधानमन्त्रीको सचिवालयले आधिकारिक प्रतिक्रिया दिएको छ । सचिवालयले कसैको दबाव वा प्रभावमा मन्त्री बनाउने वा हटाउने निर्णय नहुने स्पष्ट गरेको छ ।

प्रधानमन्त्रीको सचिवालयद्वारा जारी विज्ञप्तिमा भनिएको छ, ‘मन्त्रीको नियुक्ति वा पदमुक्तिको अधिकार विशुद्धरूपमा प्रधानमन्त्रीको अधिकारक्षेत्रभित्र पर्ने विषय हो । त्यसैले यस विषयमा कसैको दबाव वा प्रभावमा कुनै निर्णय गरिँदैन ।’

हालका दिनमा बालेनले प्रधानमन्त्रीसँग भेट गरी गृहमन्त्री अर्याललाई हटाउन माग गरेको भन्ने समाचार विभिन्न सञ्चारमाध्यममा आएका थिए । तर सचिवालयले ती समाचारलाई असत्य र भ्रम फैलाउने प्रयासका रूपमा व्याख्या गरेको छ ।

विज्ञप्तिमा गृहमन्त्री अर्यालको भूमिकाको प्रशंसा गर्दै भनिएको छ, ‘जेनजी आन्दोलनबाट प्राप्त जनादेशअनुसार गठित वर्तमान सरकारले असामान्य परिस्थितिमा राष्ट्रको गहन जिम्मेवारी सम्हालिरहेको छ । गृहमन्त्री अर्यालले आगामी निर्वाचन शान्तिपूर्ण र सफल बनाउन, देशभर शान्ति–सुरक्षा कायम राख्न तथा सुरक्षा निकायहरूको मनोबल उच्च राख्न अहोरात्र खटिनुभएको छ, जुन सबैलाई विदितै छ ।’

प्रधानमन्त्रीका प्रमुख स्वकीय सचिव आदर्शकुमार श्रेष्ठले अहिलेको संवेदनशील समयमा अफवाह नफैलाउन र अपुष्ट सूचनामा विश्वास नगर्न सर्वसाधारणलाई आग्रह गरेका छन् ।

प्रकाशित मिति: बिहीबार, कात्तिक १४, २०८२ १०:४७