एनपीएल दोश्रो संस्करण आजदेखि सुरू : उद्घाटन खेलमा जनकपुर बोल्ट्स र काठमाडौं गोर्खाज आमनेसामने

खेल

गृहपृष्ठ
खेल

उद्घाटन खेल एनपीएल दोश्रो संस्करण आजदेखि सुरू : उद्घाटन खेलमा जनकपुर बोल्ट्स र काठमाडौं गोर्खाज आमनेसामने

नेपालकभर सोमबार, मंसिर २, २०८२

काठमाडौं

नेपाली क्रिकेटको फ्रेन्चाइज महोत्सव नेपाल प्रिमियर लिग (एनपीएल) को दोस्रो संस्करण आजदेखि औपचारिक रूपमा सुरुवात हुँदैछ। मंसिर १ गतेदेखि सुरु हुने प्रतियोगिताको उद्घाटन खेलमा साविक विजेता जनकपुर बोल्ट्स लाई काठमाडौं गोर्खाज ले कडा चुनौती दिने तयारी गरेको छ।

यी दुई टोलीबीच एनपीएलमा यो दोस्रो भिडन्त हो। पहिलो संस्करणको लिग चरणमा जनकपुरले काठमाडौंलाई पाँच विकेटले हराएर अग्रता लिएको थियो।

पहिलो संस्करणमा उत्कृष्ट प्रदर्शन गर्दै जनकपुरले फाइनलमा सुदूरपश्चिम रोयल्सलाई पाँच विकेटले पराजित गर्दै उपाधि जितेको थियो भने काठमाडौं गोर्खाज पाँचौँ स्थानमा रहँदै प्रतियोगिताबाट बाहिरिएको थियो।

यसपालिको उद्घाटन खेल काठमाडौंकीर्तिपुरस्थित त्रिवि क्रिकेट मैदानमा दिउँसो ४ बजेदेखि सुरु हुनेछ। खास कुरा के भने—यो खेल नेपाली क्रिकेट इतिहासमै पहिलो पटक फ्लडलाइटमा खेलिने मैच हुने छ, जसले प्रतियोगिताप्रतिको उत्साहलाई झनै उच्च बनाएको छ।

एनपीएलको दोस्रो संस्करणका सबै खेल यही कीर्तिपुरमै हुनेछन्। क्यानका अनुसार प्रतियोगितामा ९ दिउँसाका खेल र २३ डे–नाइट (फ्लडलाइट) खेल हुनेछ। मंसिर २७ गतेसम्म चल्ने यस प्रतियोगितामा लिग चरण, प्लेअफ र फाइनलसहित ३२ खेल खेलाइने छ।

प्रतियोगितामा पहिलो संस्करणका सबै आठ टोली नै सहभागी छन्—

जनकपुर बोल्ट्स
सुदूरपश्चिम रोयल्स
कर्णाली याक्स
पोखरा एभेन्जर्स
विराटनगर किङ्स
चितवन राइनोज
काठमाडौं गोर्खाज
लुम्बिनी लायन्स

आजको उद्घाटन भिडन्तमा साविक च्याम्पियन जनकपुर आफ्नो प्रभुत्व कायम राख्ने प्रयासमा छ भने काठमाडौं नयाँ उर्जा र रणनीतिसहित बदला लिन मैदान उत्रिदैछ। अब हेर्न बाँकी छ—उद्घाटन खेलको बाजी कसले मार्ला?

प्रकाशित मिति: सोमबार, मंसिर २, २०८२ ०७:३१