भारतमा नयाँ श्रम संहिता विरुद्ध देशव्यापी प्रदर्शन, हजारौँ श्रमिक सडकमा

समाचार

गृहपृष्ठ
समाचार

श्रमिक सडकमा भारतमा नयाँ श्रम संहिता विरुद्ध देशव्यापी प्रदर्शन, हजारौँ श्रमिक सडकमा

नेपालकभर बुधबार, मंसिर ११, २०८२

भारत सरकारद्वारा लागू गरिएको नयाँ श्रम संहिताविरुद्ध बुधबार देशभर व्यापक प्रदर्शन भएको छ। विभिन्न ट्रेड युनियनका अगुवाइमा हजारौँ श्रमिकहरू सडकमा उत्रिँदा औद्योगिक क्षेत्रदेखि सहरका प्रमुख स्थानहरूसम्म विरोधका कार्यक्रम चलाए।

युनियनहरूले नयाँ श्रम कानूनले कामदारहरूले वर्षौंदेखि हासिल गरेका अधिकार कमजोर पार्ने, कर्पोरेट स्वार्थलाई प्राथमिकता दिने तथा दीर्घकालीन श्रम सुरक्षालाई चुनौती दिने आरोप लगाएका छन्। सरकारको दाबी अनुसार नयाँ सुधारले पुराना औपनिवेशिक श्रम कानूनलाई प्रतिस्थापन गर्दै नियमन प्रणालीलाई सरल बनाउने उद्देश्य राखे पनि श्रमिक संगठनहरू भने यसको कठोर रूपमा विरोध गरिरहेका छन्।

गत हप्ता मात्रै लागू गरिएको श्रम सुधारमार्फत २९ फरक–फरक श्रम कानूनलाई समेटेर चार प्रमुख श्रम कोड बनाइएको छ। यससँगै करिब १,४०० नियम घटेर ३५० जति मात्र कायम रहन पुगेका छन्। सरकारले यसलाई ऐतिहासिक संरचनात्मक सुधार बताउँदै प्रशंसा गरे पनि यूनियनहरूले भने सुधारको संरचनाले मजदुर पक्षको सुरक्षामा कटौती गरेको दाबी दोहोर्‍याएका छन्।

न्यु ट्रेड युनियन इनिसिएटिभका नेता गौतम मोदीका अनुसार विभिन्न क्षेत्रका श्रमिकहरूले कारखाना परिसरबाहिर, प्रमुख चोक–चौराहामा तथा सरकारी कार्यालय अगाडि नाराबाजी गर्दै सरकारप्रति असन्तुष्टि व्यक्त गरेका छन्।

नयाँ कोडले सुरक्षा मापदण्ड कडाइ गर्ने तथा गिग तथा प्लेटफर्म कामदारलाई सामाजिक सुरक्षाका केही सुविधामा पहुँच दिलाउने व्यवस्था गरे पनि अन्य प्रावधानमा गुनासो बढी छ। यूनियनहरूको भनाइमा श्रम संहिताले कारखाना सिफ्ट लम्ब्याउने, हड्तालका प्रक्रिया थप जटिल बनाउने तथा मध्यम आकारका उद्योगहरूले कामदारलाई सजिलै बर्खास्त गर्न सक्ने खालका व्यवस्थालाई मार्ग प्रशस्त गरेको छ।

श्रमिक संगठनहरूले सरकारसँग उक्त प्रावधान पुनर्विचार गर्न माग गर्दै आन्दोलन जारी राख्ने चेतावनी दिएका छन्।

प्रकाशित मिति: बुधबार, मंसिर ११, २०८२ १९:०१