पोखराको पहिलो जित, जनकपुरको हार शृंखला कायमै

खेल

गृहपृष्ठ
खेल

हार शृंखला पोखराको पहिलो जित, जनकपुरको हार शृंखला कायमै

नेपालकभर बिहीबार, मंसिर १२, २०८२

काठमाडौं ।

नेपाल प्रिमियर लिग (एनपीएल) दोस्रो संस्करणमा पोखरा एभेन्जर्सले साविक विजेता जनकपुर रोयल्सलाई २४ रनले पराजित गर्दै पहिलो जित दर्ता गरेको छ । लगातार दुई खेल हारेको पोखराले तेस्रो खेलमा उत्कृष्ट प्रदर्शन गर्दै विजयी सुरुआत गरेको हो । जनकपुरको भने यो लगातार तेस्रो हार हो ।

कीर्तिपुरस्थित त्रिवि क्रिकेट मैदानमा १५६ रनको लक्ष्य पछ्याउँदै उत्रिएको जनकपुरले निर्धारित २० ओभरमा नौ विकेट गुमाएर १३० रनमात्र जोड्न सक्यो । जनकपुरका लागि वायन पार्नेलले आठौँ नम्बरमा आएर ३८ बलमा दुई चौका र चार छक्कासहित अर्धशतक बनाए । तर, मांसपेसीमा खिचाव आएपछि ५० रन पूरा गरेलगत्तै ‘रिटायर्ड हर्ट’ हुनुपर्‍यो । सञ्जय कृष्णमुर्थीले २५, माज सदाकले २० र ललित राजवंशीले अविजित १० रन बनाए । ओपनर आसिफ सेख गोल्डेन डक हुन् भने कप्तान अनिल साह मात्र एक रनमा सम्हालिन सके ।

पोखराका बलर विपीन खत्रीले शानदार प्रदर्शन गर्दै चार ओभरमा मात्र १५ रन खर्चेर चार विकेट लिए । सुमित बर्माले दुई विकेट, कुशल भुर्तेल र जिम्मी निसमले एक–एक विकेट हात पारे ।

यसअघि टस जितेर पहिलो ब्याटिङ गरेको पोखराले २० ओभरमा ६ विकेट गुमाएर १५५ रनको प्रतिस्पर्धी योगफल बनाएको थियो । पोखराका सुमित बर्मा अविजित ५० रनसहित टिमका शीर्ष स्कोरर बने । २९ बलको आफ्नो इनिङ्समा उनले दुई चौका र चार छक्का प्रहार गरे ।

ओपनर दीनेश खरेल र एडम रोसिङ्टनले पहिलो विकेटका लागि ६१ रनको साझेदारी गर्दै टिमलाई बलियो सुरुआत दिलाए । रोसिङ्टनले २४ रन जोडे । तर, क्रमशः विकेट पतन भएपछि पोखरा ६४–४ को अवस्थामा पुगेको थियो । त्यसपछि सुमित र त्रितराज दासबीचको ७२ रनको साझेदारीले टिमलाई पुनः उकास्यो । त्रितराजले २८ बलमा २९ रन बनाए ।

जनकपुरका सञ्जय कृष्णमुर्थीले ३ विकेट लिए भने अनिल साह र ललित राजवंशीले एक–एक विकेट हात पारे ।

यो जितसँगै पोखराले लिगमा पुनः आत्मविश्वास बढाएको छ भने जनकपुर निरन्तर दबाबमा परेको छ।

प्रकाशित मिति: बिहीबार, मंसिर १२, २०८२ १९:३१