डडेल्धुरा ।
डडेल्धुरा अस्पतालले अबदेखि ओपीडी सेवा दुई सिफ्टमा सञ्चालन गर्न थालेको छ। यसअघि केवल एक सिफ्टमा चल्ने ओपीडी सेवा दिउँसो २:०० बजेपछि बन्द हुने भएकाले सुदूरपश्चिमका सात पहाडी जिल्लाबाट आउने बिरामीहरूलाई दिनदिनै समस्या भोग्नु परेको थियो। ओपीडी समय सकिएपछि अस्पताल पुगेका बिरामीले इमेर्जेन्सी टिकट काट्नुपर्ने वा अर्को दिन फर्कनुपर्ने बाध्यता हटेको अस्पतालले जनाएको छ।
अस्पतालले पहिलो पटक ११औं तहका मेडिकल सुपरिन्टेन्डेन्ट भएपछि सेवा सुचारु गर्न थप ध्यान दिएको छ। दिउँसोपछि ओपीडी बन्द हुँदा चिकित्सक नहेरेपछि टिकट नपाउने र बाध्यतावश बिरामीले अन्यत्र धाउनुपर्ने अवस्था उत्पन्न भएको थियो। अब भने चिकित्सकले कार्यालय समयसम्म सेवा दिनुपर्ने व्यवस्था मिलाइएपछि एउटै टिकटमा दुई सिफ्टमा ओपीडी सेवा उपलब्ध हुने मेसु डा. सुधा देवकोटाले बताइन्।
उनका अनुसार पहिलो सिफ्ट १२ः३० बजेसम्म र दोस्रो सिफ्ट १ः३० बजेदेखि सञ्चालन हुन्छ। बीचमा चिकित्सकलाई एक घण्टा खाजाको समय दिइएको छ। चिसो याममा डेढ घण्टा र गर्मी याममा दुई घण्टासम्म दोस्रो सिफ्ट सञ्चालन गरिने डा. देवकोटाले जानकारी दिइन्।
डा. देवकोटाका अनुसार दुई सिफ्टमा ओपीडी सञ्चालन हुन थालेपछि दिउँसो लगत्तै अस्पताल पुग्ने बिरामीले सहज रूपमा उपचार पाउने विश्वास गरिएको छ। इमेर्जेन्सीमा १०० रुपियाँ तिरेर टिकट काट्नु पर्ने बाध्यता हटेको पनि उनले बताइन्।
विशेषज्ञ अभाव अझै चुनौती
डडेल्धुरा अस्पताल सुदूरपश्चिम प्रदेशको एकमात्र संघीय मातहतको अस्पताल हो। विशेष विशेषज्ञ सेवा उपलब्ध हुने भनिए पनि आवश्यकताअनुसार विशेषज्ञ नहुँदा बिरामीले सहज उपचार पाउन सकेका छैनन्। हाल अस्पतालमा १९ जना विशेषज्ञ चिकित्सक र २५ जना मेडिकल अधिकृत छन्।
मुख्य समस्या बालरोग विशेषज्ञको अभाव रहेको मेसु डा. देवकोटाले बताइन्। एक जना बालरोग विशेषज्ञ चिकित्सकले चासो देखाएका कारण छिट्टै अस्पतालमा सेवामा आउने सम्भावना रहेको उनले जानकारी दिइन्।
अस्पतालमा अहिले तीन जना स्त्रीरोग, चार जना शल्य, तीन जना हाडजोर्नी तथा तीन जना भित्री रोग (मेडिसिन) विशेषज्ञ रहेका छन्। नाक–कान–घाँटी, छाला तथा बालरोग विशेषज्ञ नहुँदा केही सेवा प्रभावित भए पनि बाँकी सबै साधारण तथा विशेषज्ञ सेवा उपलब्ध रहेको मेसु देवकोटाले बताइन्।
दुई सिफ्टमा ओपीडी सेवा सुरु भएपछि पहाडी जिल्लाबाट आउने बिरामीले सहज उपचार पाउने अपेक्षा गरिएको छ।
