काठमाडौं ।
अमेरिकी राष्ट्रपति डोनाल्ड ट्रम्पले तेस्रो विश्वका देशहरूबाट आउने शरणार्थीलाई अनिश्चितकालका लागि रोक्ने घोषणा गरेका छन्। उनले अमेरिकालाई फेरि “महान” बनाउन कडा कदम चाल्नुपर्ने भन्दै बिहीबार वासिङ्टन डीसीमा पत्रकारहरूसँग कुरा गर्दै यस्तो घोषणा गरेका हुन्।
ट्रम्पले भने, “जो मानिसहरू अमेरिकाका लागि फाइदाजनक छैनन् वा जो हाम्रो देशलाई साँचो माया गर्दैनन्, उनीहरूलाई पनि हटाइनेछ।” उनका अनुसार हालका अध्यागमन नीतिहरूले अमेरिकीहरूको जीवन “झनै खराब” बनाइदिएका छन्।
१९ देशका प्रवासीको कडा पुनर्जाँच
अमेरिकी सिटिजनसिप एन्ड इमिग्रेसन सर्भिस (USCIS) का निर्देशक जोसेफ एडलोका अनुसार, ट्रम्प प्रशासनले १९ देशलाई “चिन्ताजनक देश” (Concerns Countries) का रूपमा वर्गीकरण गर्दै ती मुलुकका नागरिकहरूको ग्रीन कार्डसहित सबै अध्यागमन प्रक्रिया पुनर्परीक्षण गर्ने निर्णय गरिसकेको छ।
यो नयाँ नीति नोभेम्बर २७ देखि लागू भइसकेको छ।
गैर–नागरिकलाई सरकारी सुविधा बन्द
राष्ट्रपति ट्रम्पले अब गैर–नागरिकलाई कुनै सरकारी सुविधा, अनुदान वा लाभ नदिने घोषणा गरेका छन्।
साथै, देशको सुरक्षामा खतरा मानिएका वा “पश्चिमी सभ्यतासँग मेल नखाने” व्यक्तिहरूलाई देशबाट निकालिने चेतावनी पनि दिएका छन्।
ट्रम्पका अनुसार, “पूर्ण समाधान भनेको ‘रिभर्स माइग्रेसन’ अर्थात् मानिसहरूलाई उनीहरूकै देश फर्काएर पठाउनु हो।”
नेसनल गार्ड्समाथिको गोलीकाण्डपछि कडाइ
बिहीबारै ट्रम्पले आफ्नो घोषणा सार्वजनिक गर्नुअघि वासिङ्टन डीसीमा दुई जना नेसनल गार्ड्सलाई गोली हानिएको घटनाले परिस्थिति थप संवेदनशील बनेको छ।
एफबीआईले पक्राउ परेका व्यक्ति २९ वर्षीय अफगान शरणार्थी रहमानुल्लाह लाकनवाल रहेको पुष्टि गरेको छ।
लाकनवाल अगस्ट २०२१ मा अमेरिका प्रवेश गरेका थिए र २०२५ अप्रिलमा उनको शरणार्थी आवेदन स्वीकृत भएको थियो।
यस घटनालाई अमेरिकी न्याय विभागले आतंकवादी हमला का रूपमा अनुसन्धान गरिरहेको छ।
ट्रम्पले भिडियो सन्देश जारी गर्दै आरोपीलाई “जनावर” वर्णन गरे र पेन्टागनलाई डीसीमा सुरक्षा बढाउन थप ५०० नेसनल गार्ड्स पठाउन निर्देशन दिए।
अफगान नागरिकको अध्यागमन प्रक्रिया ‘अनिश्चितकालका लागि रोकियो’
गोलीकाण्डपछि USCIS ले सबै किसिमका अफगान अध्यागमन प्रक्रियालाई रोक्ने निर्णय सार्वजनिक गरेको छ।
एजेन्सीले सुरक्षा परीक्षण र ‘वेटिङ सिस्टम’ को पुनःसमीक्षा पूरा नहुँदासम्म कुनै पनि अफगान नागरिकको कागजी प्रक्रिया अगाडि नबढाइने जनाएको छ।
ट्रम्पको आरोप : बाइडेन शासनमा २ करोड विदेशी ‘बिना जाँच’ प्रवेश
ट्रम्पले दाबी गरेका छन् कि बाइडेन प्रशासनका दौरान “२ करोडभन्दा धेरै विदेशीहरू उचित जाँच–पड़ताल बिना अमेरिका प्रवेश गरेका” छन्, जसले राष्ट्रको सुरक्षा जोखिममा परेको छ।
उनी भन्छन्, “अवैध र समस्या पैदा गर्ने जनसंख्या वृद्धि अमेरिकाको स्थायित्व र सामाजिक संरचनाका लागि खतरनाक बनिसकेको छ।”
