ओलीप्रति लक्षित गर्दै प्रचण्डको टिप्पणी : ‘दुई तिहाइको दम्भले हेलिकोप्टर चढेर भाग्दा पनि चेत आएन’

राजनीति

गृहपृष्ठ
राजनीति

चेत ओलीप्रति लक्षित गर्दै प्रचण्डको टिप्पणी : ‘दुई तिहाइको दम्भले हेलिकोप्टर चढेर भाग्दा पनि चेत आएन’

नेपालकभर आइतबार, मंसिर १५, २०८२

काठमाडौँ

नेपाली कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्डले चुनाव जितेर मात्रै स्थायी उपलब्धि हासिल नहुने बताएका छन्। दाङको देउखुरीमा आयोजित एकता सन्देशसभामा सम्बोधन गर्दै उनले एमाले अध्यक्ष तथा पूर्वप्रधानमन्त्री केपी शर्मा ओलीप्रति कडा टिप्पणी गरे।

प्रचण्डले दुई तिहाइ बहुमत हात परेको बेला पनि ‘हेलिकोप्टर चढेर भाग्नुपरेको’ भन्दै ओलीको नेतृत्वप्रति कटाक्ष गरे। उनले भने, ‘चुनाव जितेर मात्रै केही हुँदैन रहेछ। अस्तिको संसद्मा कांग्रेस–एमालेको दुई तिहाइ थियो, के पाए? भाग्नुपर्‍यो, हेलिकोप्टर चढेर भाग्नुपर्‍यो।’

उनका अनुसार साम्राज्यवादविरुद्ध र जनताका मुद्दामा लड्न १५ वाम घटकबीच एकता भएको हो। उनले विगतमा पनि दुई तिहाइको घमण्ड नगर्न तत्कालीन सत्तारूढ गठबन्धनलाई सचेत गराएको दाबी गरे।

प्रचण्डले थपे, ‘सदनबाटै भनेको थिएँ— दुई तिहाइको घमण्ड नगर्नुस्, जनता तपाईंहरूसँग रुष्ट भइसकेका छन्, तपाईंहरूले भ्रष्टाचारीलाई बचाइरहनुभएको छ।’ आफू नेतृत्वको सरकारले जनताको हक–अधिकार र भ्रष्टाचारविरुद्ध बोल्दा सरकारबाट हटाइएको आरोप पनि उनले दोहोर्याए।

जेन–जी आन्दोलनमा भएको विध्वंसका योजनाकार आफूलाई बनाएको ओलीको आरोपको प्रतिवाद गर्दै प्रचण्डले भने, ‘केपी ओली आजभोलि प्रचण्डले नै सबै गरायो भन्छन्। उनीहरूको कुकर्मकै कारण यस्तो भयो भन्ने चेत अझै आएको छैन, दम्भ अझै हटेको छैन।’

सभामा प्रचण्डले जनताकै विवेकले अन्त्यतः दम्भी नेतृत्वलाई सत्ताबाट हटाइदिने बताएका थिए।

प्रकाशित मिति: आइतबार, मंसिर १५, २०८२ ०७:२०