काठमाडौँ
श्रीलंकामा ‘दितवा’ नामक शक्तिशाली तूफानबाट उत्पन्न बाढी–पहिरोले ठूलो मानवीय क्षति पुर्याएको छ। भीषण वर्षापछि आएको प्रलंयकारी बाढी–पहिरोमा कम्तिमा १३२ जनाको मृत्यु भएको छ भने १७६ जना अझै बेपत्ता छन्।
राष्ट्रपति अनुरा कुमारा दिशानायकेले देशव्यापी आपतकाल घोषणा गर्दै अन्तर्राष्ट्रिय समुदायलाई तत्काल सहयोगका लागि आग्रह गरेका छन्। विदेशमा रहेका श्रीलंकाली नागरिकलाई पनि आर्थिक सहयोगस्वरूप पैसा पठाउन सरकारको आह्वान छ।
८ वर्षयताकै सबैभन्दा ठूलो विपत्ति
श्रीलंकामा पछिल्लो आठ वर्षयताकै यो सबैभन्दा ठूलो प्राकृतिक विपत्ति हो। २०१७ मा आएको बाढी–पहिरोमा २०० जनाको मृत्यु र लाखौँ मानिस विस्थापित भएका थिए।
विपद् व्यवस्थापन विभागका अनुसार यसपटक १५ हजारभन्दा बढी घर पूर्णरूपमा नष्ट भएका छन् भने
७८ हजारभन्दा बढी मानिस अस्थायी शिविरहरूमा बस्दै आएका छन्।
विभागका महानिर्देशक सम्पत कुतोवेगोदाका अनुसार सेना, वायुसेना र नौसेनाको सयौँ टोली उद्धार तथा राहतमा परिचालित छन्। तर, पहिरोले सडक अवरुद्ध गरेकाले धेरै ग्रामीण बस्तीमा पुग्न कठिनाइ भइरहेको छ।
दुर्गम गाउँ अलगिए, खाना–पानी संकट
सबैभन्दा बढी प्रभावित क्षेत्र मध्य श्रीलंका हो। बादुल्ला जिल्ला सडक विहीन बनेको छ। मास्पान्ना गाउँका बासिन्दा समन कुमाराले स्थानीय मिडियासँग भने,
“यहाँ न त सहायता आउन सक्छ, न त हामी बाहिर निस्किन सक्छौं। खाना छैन, पिउने पानी पनि संकटमा छ।”
देशको करिब एक तिहाइ भूभागमा विद्युत् आपूर्ति, खानेपानी र इन्टरनेट सेवा अवरुद्ध भएको सरकारी अधिकारीहरूले जनाएका छन्।
भारतबाट सबैभन्दा पहिलाको सहयोग
विपत्तिपछि सबैभन्दा छिटो भारतले दुईवटा विशेष विमानमार्फत राहत सामग्री पठाएको छ। कोलम्बोमा तैनाथ भारतीय जहाजले पनि खाद्यान्न र अन्य सामग्री प्रभावित क्षेत्रमा पु¥याइरहेको भारतीय अधिकारीहरूले जनाएका छन्।
भारतीय प्रधानमन्त्री नरेन्द्र मोदीले मृत्यु भएका नागरिकप्रति श्रद्धाञ्जली व्यक्त गर्दै श्रीलंका सरकारले मागेअनुसार थप सहयोग उपलब्ध गराउने आश्वासन दिएका छन्।
भारततर्फ ‘दितवा’ अगाडि बढ्दै
तूफान भारततर्फ अघि बढिरहेको भन्दै भारत मौसम विभागले आगामी ४८ घण्टामा भीषण वर्षा र तेज हावाहुरीको चेतावनी जारी गरेको छ। चेन्नई विमानस्थलमा ५४ उडान रद्द गरिएको छ।
विपद्पछि श्रीलंकाका प्रधानमन्त्री हारिनी अमारासूर्या विभिन्न देशका राजदूतहरूसँग भेट गर्दै तत्काल मानवीय सहायता उपलब्ध गराउन आग्रह गरिरहेकी छन्।
