काठमाडौं ।
दोस्रो संस्करणको नेपाल प्रिमियर लिग (एनपीएल) खेल्न दक्षिण अफ्रिकाका पूर्व कप्तान तथा विश्वप्रसिद्ध क्रिकेटर फाफ डु प्लेसिस भोलि सोमबार नेपाल आउने भएका छन्। विराटनगर किङ्ससँग अनुबन्धित डु प्लेसिस जारी लिगमा १८ खेल सम्पन्न भएपछि नेपाल प्रस्थान गर्ने कार्यक्रम छ।
मार्की खेलाडी तथा कप्तान सन्दीप लामिछानेको नेतृत्वमा विराटनगर किङ्सले फाफ डु प्लेसिस बिना नै पाँच खेलमा ८ अंक हासिल गर्दै तालिकाको दोस्रो स्थान कायम राखेको छ। यसअघि उनले आइपीएलको आगामी सिजन नखेल्ने निर्णय गरेपछि एनपीएल पनि गुम्न सक्ने आशंका गरिएको थियो। तर, डु प्लेसिस नेपाल आउने पक्का भएपछि प्रतियोगिता अन्तर्राष्ट्रिय ध्यानाकर्षणमा ठूलो फड्को मार्ने अपेक्षा गरिएको छ।
४१ वर्षीय डु प्लेसिसले दक्षिण अफ्रिकाका लागि तीनै फम्र्याटमा उत्कृष्ट प्रदर्शन गरेका छन्। उनको अनुभव, आक्रमक ब्याटिङ र कडा नेतृत्व क्षमताले विराटनगर किङ्सलाई यस सिजनको उपाधि दाबेदार बनाउने विश्वास गरिएको छ।
को हुन् फाफ डु प्लेसिस ?
फ्रान्स्वा फाफ डु प्लेसिसको जन्म १३ जुलाई १९८४ मा दक्षिण अफ्रिकाको प्रिटोरियामा भएको थियो। दाहिने हातका मिडल–अर्डर ब्याटर र लेग–ब्रेक बलर उनी विश्व क्रिकेटका उत्कृष्ट फिल्डरमध्ये एक मानिन्छन्।
उनले १८ जनवरी २०११ मा भारतविरुद्ध ओडीआई डेब्यू गरेका थिए, जहाँ उनले नटआउट ६० रन बनाए। त्यसपछि २३ नोभेम्बर २०१२ मा अस्ट्रेलियाविरुद्ध एडिलेडमा टेस्ट डेब्यू गर्दै पहिलो इनिङ्समै नटआउट ११० रन बनाएर म्यान अफ द म्याच बने।
डु प्लेसिस दक्षिण अफ्रिकाका लागि तीनै फम्र्याटमा शतक बनाउने पहिलो खेलाडी हुन्। कप्तान भएपछि सन् २०१६ मा उनले इतिहास रचेका थिए। साथै, २०१७ मा श्रीलंकाविरुद्ध उनले बनाएको १८५ रन ओडीआईमा दक्षिण अफ्रिकाको दोस्रो उच्चतम व्यक्तिगत स्कोर हो।
कप्तानका रूपमा उनको ओडीआई जित प्रतिशत ७३.६८ रहेको छ। उनी २०१६ मा अस्ट्रेलियालाई टेस्ट, ओडीआई र टी–२०—तीनै फम्र्याटमा हराउने पहिलो अन्तर्राष्ट्रिय कप्तान बनेका थिए। २०२१ मा उनले टेस्ट क्रिकेटबाट सन्यास लिएका थिए।
टी–२० क्रिकेटमा उनले ४२४ खेल खेल्दै ११,९०६ रन र २११ क्याच लिएको तथ्यांकले उनलाई विश्वका उत्कृष्ट फिल्डर र फ्रेन्चाइज क्रिकेट स्टारका रूपमा स्थापित गरेको छ।
फ्रेन्चाइज क्रिकेटमा चम्किएका कप्तान
डु प्लेसिसले चेन्नई सुपर किङ्स, राइजिङ पुणे सुपरजायन्ट, रोयल च्यालेन्जर्स बैंगलोर, टेक्सास सुपर किङ्स, सेन्ट लुसिया किङ्सलगायत टिमबाट १५४ आइपीएल खेल खेलेका छन्।
आइपीएलमा उनले ४७ सय रन बनाएका छन्, जसमा ३९ अर्धशतक छन्। उनले चेन्नई सुपर किङ्सलाई २०१८ र २०२१ मा आइपीएल उपाधि जिताउँदामा महत्वपूर्ण भूमिका खेलेका थिए।
सन् २०१९ मा पर्ल रक्सलाई मजान्सी सुपर लिग जिताउँदा उनी ३१८ रनसहित सर्वाधिक रनकर्ता बनेका थिए। जुलाई २०२५ मा टेक्सास सुपर किङ्सको कप्तानी गर्दा उनी टी–२० क्रिकेट इतिहासमै सबैभन्दा धेरै रन बनाउने कप्तान बनेका थिए।
फाफ डु प्लेसिसको आगमनले एनपीएलको आकर्षण बढ्ने मात्र होइन, नेपालमा फ्रेन्चाइज क्रिकेटको विकास र अन्तर्राष्ट्रिय पहुँच विस्तारमा समेत महत्वपूर्ण योगदान गर्ने अपेक्षा गरिएको छ।
