बुहारी हत्या आरोपमा ससुरा पक्राउ

समाचार

गृहपृष्ठ
समाचार

शंकास्पद मृत्यु बुहारी हत्या आरोपमा ससुरा पक्राउ

नेपालकभर आइतबार, मंसिर १५, २०८२

जनकपुरधाम ।

जनकपुरधाम–४ कटैयाचौरीमा २७ वर्षीया रोशनी झाको शंकास्पद मृत्यु प्रकरणले गम्भीर रूप लिँदै गएको छ। माइतीपक्षले हत्या भएको आरोप लगाएपछि प्रहरीले रोशनीका ससुरा रुद्रनारायण मिश्रलाई पक्राउ गरेको हो।

बिहीबार राति घरको भर्‍याङबाट खसेको दाबी गर्दै ससुराली पक्षले रोशनीलाई उपचारका लागि गोदावरी अस्पताल पुर्‍याएका थिए, तर चिकित्सकले उनलाई मृत घोषित गरेका थिए। प्रारम्भिक रूपमा ‘दुर्घटना’ दाबी गरिएको घटनाबारे माइती पक्षले गम्भीर शंका व्यक्त गर्दै रोशनीको श्रीमान प्रशान्त मिश्र, ससुरा रुद्रनारायणसहित अन्य आफन्तले नियोजित रूपमा हत्या गरेको आरोप लगाएका छन्।

माइतीपक्षले रोशनीको घाँटी थिचेर हत्या गरिएको र प्रमाण नष्ट गर्न घरमा रहेका कपडा तथा सामग्री जलाइएको दाबी गरेको छ। घटनास्थलमा जलेका अवशेष फेला परेको र आरोपीहरूले पटक–पटक अभिव्यक्ति परिवर्तन गरेको रोशनीका मामा पंकज झाले बताएका छन्।

धनुषाका प्रहरी प्रमुख एसपी रुगमबहादुर कुँवर आफैँले घटनास्थलको निरीक्षण गर्दै रोशनीको मृत्यु शंकास्पद भएको पुष्टि गरेका छन्। प्रहरीका अनुसार घटनाबारे विस्तृत अनुसन्धान सुरु गरिएको छ। पीडित परिवारले रोशनीका श्रीमान प्रशान्त मिश्र, डा. धिरज झा, प्रशान्तकी बहिनी तथा भिनाजूसमेत प्रमाण नष्ट गर्न संलग्न रहेको आरोप लगाएका छन्।

चौतर्फी दबाबपछि एसपी कुँवर घटनास्थल पुगेपछि प्रहरीले ससुरा रुद्रनारायण मिश्रलाई पक्राउ गरेको हो। प्रारम्भिक चरणमा प्रहरी प्रशासनले किटानी जाहेरी लिन अस्वीकार गरे पनि आइतबार किटानी जाहेरी दर्ता भएको छ।

घटना उजागर हुँदै गएपछि स्थानीयवासी र माइतीपक्षले निष्पक्ष अनुसन्धान तथा न्यायका लागि दबाब बढाएका छन्।

प्रकाशित मिति: आइतबार, मंसिर १५, २०८२ १५:४४