बारा, मंसिर १४ ।
बाराको प्रसौनी गाउँपालिका–६ स्थित किरण बेभरेज नेपाल प्रा.लि.का व्यवस्थापक रामकिशोर सिंहको जघन्य हत्यामा संलग्न रहेको आरोपमा प्रहरीले दुई जनालाई पक्राउ गरेको छ। पक्राउ परेकामध्ये पर्सा, वीरगञ्ज महानगरपालिका–२२ मनियारीका २१ वर्षीय राजन कुमार राम र ३२ वर्षीय प्रमोद साह तुरहा रहेका जिल्ला प्रहरी कार्यालय बाराका निमित्त प्रहरी प्रवक्ता प्रहरी निरीक्षक खेमप्रसाद नेपालले जानकारी दिए।
प्रहरीले घटनास्थल तथा अभियुक्तहरूको साथबाट रगतले दागिएको फलामको छुरा र एक थान इँट दसीका रूपमा बरामद गरेको छ। गत मंसिर ११ गते उद्योगदेखि करिब २५ मिटर उत्तरका खाल्डोमा व्यवस्थापक सिंहको शव फेला परेको थियो। शवमा धारिलो हतियारले प्रहार गरी गरिएको एकाधिक गहिरा चोट भेटिएका थिए।
कामबाट हटाइएपछि रिसइबीले हत्या
मुख्य अभियुक्त राजनकुमार राम उक्त पानी उद्योगमा चालकको रूपमा कार्यरत थिए। प्रहरीका अनुसार गत वर्ष गढीमाई मेलामा गाडीको क्लच प्लेट जलाएको विषयमा मृतक सिंह र राजनबीच विवाद भएको थियो। केही समय काम छाडेका राजन कार्तिक १ देखि मंसिर १० सम्म पुनः उद्योगमा फर्केका थिए।
उद्योगले तोकेको खुद्रा मूल्य ११० रुपैयाँ भएकामा राजनले ११५–१२० रुपैयाँमा पानी बेचेको थाहा पाएपछि व्यवस्थापक सिंहले मंसिर १० गते उनलाई हिसाबकिताब मिलाएर कामबाट हटाएका थिए। यही विषयले रिसइबी बढेपछि राजनले साथी प्रमोद साह तुरहासहित उपद्रवको योजना बनाएको प्रहरीको भनाइ छ।
मंसिर ११ गते साँझ जाँड–रक्सी सेवन गरी उद्योग पुग्दा व्यवस्थापक सिंह एक्लै रहेको मौका छोपी दुवैले धारिलो हतियार र इँट प्रयोग गरी विभत्स रूपमा आक्रमण गरेको प्रारम्भिक अनुसन्धानले देखाएको प्रहरी निरीक्षक नेपालले बताए।
भारत भाग्ने क्रममा नियन्त्रण
बारा प्रहरीले पर्सा प्रहरीसँग समन्वय गर्दै फरार अभियुक्तहरू भारततर्फ भाग्ने तयारीमा रहेको सूचनाका आधारमा मुख्य अभियुक्त राजन कुमार रामलाई पर्साको छिपहरमाई गाउँपालिका–५ भिस्वा नाकाबाट पक्राउ गरेको हो। अर्का अभियुक्त प्रमोद साह तुरहा भने वीरगञ्ज महानगरपालिका–२२ मा लुकेर बसेको अवस्थामा पक्राउ परेका छन्।
पक्राउ परेकालाई बारा जिल्ला अदालतबाट ७ दिनको म्याद लिएर थप अनुसन्धान भइरहेको प्रहरीले जनाएको छ। प्रारम्भिक तथ्यहरूले घटनालाई व्यक्तिगत रिसइबी, अनुशासनहीनता र पुरानो मनमुटावसँग प्रत्यक्ष रूपमा जोडिएको प्रहरीको निष्कर्ष छ।
