एमाले रुकुम पश्चिम प्रतिनिधिमा पराजित भएपछि सांसद मल्लको असन्तुष्टि

समाचार

गृहपृष्ठ
समाचार

असन्तुष्टि एमाले रुकुम पश्चिम प्रतिनिधिमा पराजित भएपछि सांसद मल्लको असन्तुष्टि

नेपालकभर आइतबार, मंसिर १५, २०८२

रुकुमपश्चिम ।

नेकपा एमाले रुकुमपश्चिमबाट महाधिवेशन प्रतिनिधिमा पराजित भएपछि कर्णाली प्रदेशसभा सदस्य तुलसा मल्लले खुलेर असन्तुष्टि व्यक्त गरेकी छन्। उनी प्रदेशसभामा एमालेकी समानुपातिक सांसद हुन्। आसन्न ११औँ महाधिवेशनका लागि प्रतिनिधि चयनमा सहमति नजुटेपछि शनिबार भएको निर्वाचनमा मल्ल पराजित भएकी थिइन्।

मल्लले सामाजिक सञ्जाल फेसबुकमार्फत पार्टीभित्रको मतदान प्रक्रियामै अनियमितता भएको आरोप लगाएकी छन्। उनले लेखेकी छन्— “बाफिकोट, मुसिकोट र चौरजहारीका केही कमरेडहरूले पाँच–पाँचपटक, सात–सातपटक, दुई/चारपटक उपस्थित नै नहुने व्यक्तिहरूको मत हाल्नुभएको छ।”

यसरी अनियमित मत हालेर विजयी भएका नेताहरूलाई आगामी २०८४ को स्थानीय, प्रदेश तथा संघीय निर्वाचनमा जितेर देखाउन चुनौती दिँदै मल्लले व्यंग्यतापूर्वक लेखेकी छन्— “हिजो देखाइएको कला २०८४ मा पार्टीका उम्मेदवारलाई जिताउन प्रयोग गर्नुस्, म पूर्ण रूपमा विश्वस्त छु।”

शनिबार सम्पन्न निर्वाचनमा महिलातर्फको प्रतिनिधि श्रेणीमा कौशिला केसी र हिमकुमारी केसी विजयी हुँदा मल्ल पराजित भएकी थिइन्। कौशिलाले २०४, हिमकुमारीले २०३ मत पाउँदा मल्लले १११ मत मात्र प्राप्त गरेकी थिइन्।

रुकुमपश्चिममा २ हजार ५४ संगठित सदस्य रहेको एमालेले खुला तर्फ नन्दाराम देवकोटा र दिनेश चन्द, महिलातर्फ कौशिला केसी र हिमकुमारी केसी, युवा (४० वर्षमुनि) तर्फ प्रकाश खड्का तथा दलित तर्फ शशिराम परियारलाई प्रतिनिधिमा चयन गरेको छ।

रुकुमपश्चिमबाट विजयी तथा पराजित सबै नेता अध्यक्ष केपी शर्मा ओलीसमूहकै मानिने भएकोले स्थानीय नेतृत्वभित्रको प्रतिस्पर्धा र असन्तोष अझ तीव्र बनेको बताइँदैछ।

प्रकाशित मिति: आइतबार, मंसिर १५, २०८२ १५:५४