एमाले महाधिवेशनमा आज उम्मेदवारी दर्तादेखि अन्तिम नामावली प्रकाशनसम्म

समाचार

गृहपृष्ठ
समाचार

निर्वाचन तालिका एमाले महाधिवेशनमा आज उम्मेदवारी दर्तादेखि अन्तिम नामावली प्रकाशनसम्म

नेपालकभर सोमबार, मंसिर ३०, २०८२

काठमाडौँ।

नेकपा एमालेको ११औँ राष्ट्रिय महाधिवेशनअन्तर्गत नयाँ नेतृत्व चयन प्रक्रिया आइतबारदेखि औपचारिक रूपमा सुरु भएको छ। निर्वाचन तालिकाअनुसार आज उम्मेदवारको मनोनयन दर्तादेखि अन्तिम नामावली प्रकाशनसम्मका कार्यक्रम सञ्चालन हुँदैछन्।

केन्द्रीय निर्वाचन आयोगका अध्यक्ष डा. विजय सुब्बाले सार्वजनिक गरेको कार्यतालिकाअनुसार आज बिहान १०ः१५ बजे अन्तिम मतदाता नामावली प्रकाशन गरिएको छ। त्यसपछि बिहान १०ः३० बजेदेखि दिउँसो १ः३० बजेसम्म उम्मेदवारहरूको दरखास्त फाराम दर्ता गर्ने कार्यक्रम तय गरिएको छ।

दरखास्त दर्ता सकिएपछि दिउँसो २ः३० बजे उम्मेदवारहरूको प्रारम्भिक नामावली प्रकाशन गरिनेछ। प्रारम्भिक नामावलीविरुद्ध उजुरी दिन दिउँसो २ः३० बजेदेखि ३ बजेसम्म समय तोकिएको छ। सबै प्रक्रिया सम्पन्न भएपछि आजै साँझ ६ बजे उम्मेदवारहरूको अन्तिम नामावली प्रकाशन गरिने आयोगले जनाएको छ।

निर्वाचन तालिकाअनुसार भोलि (मंगलबार) बिहान ११ बजेदेखि साँझ ५ बजेसम्म मतदान हुने कार्यक्रम रहेको छ।

नेकपा एमालेको ११औँ राष्ट्रिय महाधिवेशन भक्तपुरको सल्लाघारीमा शनिबार उद्घाटन भएको थियो। आइतबारदेखि भने बन्दसत्र काठमाडौँको प्रदर्शनीमार्गस्थित भृकुटीमण्डपमा जारी छ।