जाँचबुझ आयोगले प्रधानसेनापति सिग्देलसँग लियो बयान, ओली र लेखकको बयान बाँकी

प्रशासन

गृहपृष्ठ
प्रशासन

जाँचबुझ आयोग जाँचबुझ आयोगले प्रधानसेनापति सिग्देलसँग लियो बयान, ओली र लेखकको बयान बाँकी

नेपालकभर सोमबार, मंसिर ३०, २०८२

काठमाडौं ।

भदौ २३ र २४ गते भएको जेन–जी आन्दोलनका क्रममा भएको दमन तथा हिंसात्मक घटनाको छानबिन गरिरहेको उच्चस्तरीय जाँचबुझ आयोगले प्रधानसेनापति अशोकराज सिग्देलसँग बयान लिएको छ।

गौरीबहादुर कार्कीको अध्यक्षतामा गठित आयोगले सोमबार प्रधानसेनापति सिग्देलसहित उच्च सैन्य अधिकारीहरूसँग बयान लिएको आयोगका सदस्य तथा प्रवक्ता विज्ञानराज शर्माले जानकारी दिएका छन्।

यसअघि नेपाली सेनाले आफ्नै सैन्य कानुनभन्दा बाहिर आयोगमा बयान नदिने अडान लिँदै आएको थियो। तर, सोमबार भने प्रधानसेनापति सिग्देलले अन्य उच्च अधिकारीसहित आयोगसमक्ष उपस्थित भई बयान दिएका हुन्।

जेन–जी आन्दोलनका क्रममा भएको हिंसात्मक घटनामा ७२ जनाको मृत्यु भएको थियो भने दुई हजारभन्दा बढी घाइते भएका थिए। घटनाका क्रममा संसद् भवन, सिंहदरबार, सर्वोच्च अदालतलगायत सरकारी संरचनामात्र होइन, विभिन्न राजनीतिक दलका केन्द्रीय कार्यालय, नेताहरूका निजी निवास तथा व्यावसायिक प्रतिष्ठानहरूमा समेत आगजनी र लुटपाट भएको थियो। सरकारी अध्ययनअनुसार उक्त घटनाबाट करिब ८४ अर्ब रुपैयाँ बराबरको क्षति भएको छ।

सेनासँग बयान लिइसकेपछि आयोगले अब तत्कालीन प्रधानमन्त्री तथा नेकपा (एमाले) अध्यक्ष केपी शर्मा ओली र तत्कालीन गृहमन्त्री रमेश लेखकसँग मात्र बयान लिन बाँकी रहेको जनाएको छ। ओलीले आयोगमा बयान दिन इन्कार गर्दै आएका छन् भने लेखक बयान दिन सकारात्मक रहेको बताइएको छ।

प्रकाशित मिति: सोमबार, मंसिर ३०, २०८२ १९:०१