पूर्वसचिव कार्कीसहित चार प्रतिवादीविरुद्ध पाँच अर्ब २५ करोड बिगोको ठगी मुद्दा दायर

समाचार

गृहपृष्ठ
समाचार

ठगी मुद्दा दायर पूर्वसचिव कार्कीसहित चार प्रतिवादीविरुद्ध पाँच अर्ब २५ करोड बिगोको ठगी मुद्दा दायर

नेपालकभर बुधबार, पुस २, २०८२

काठमाडौँ ।

नेपाल ट्रस्टको जग्गा लिज प्रकरणमा अनियमितता भएको ठहर गर्दै पूर्वसचिव अर्जुनबहादुर कार्कीसहित तीन जना व्यक्ति र एक कम्पनीविरुद्ध ठगी मुद्दा दायर गरिएको छ । जिल्ला सरकारी वकिल कार्यालय, काठमाडौँले बुधबार जिल्ला अदालत काठमाडौँमा पाँच अर्ब २५ करोड ६३ लाख रुपैयाँ बिगो कायम गरी मुद्दा दायर गरेको हो ।

मुद्दामा तत्कालीन सचिव अर्जुनबहादुर कार्की, सहसचिव लेखबहादुर कार्की, थामसेर्कु ट्रेकिङ प्रालिका अध्यक्ष ल्हाक्पा सोनाम शेर्पा तथा थामसेर्कु ट्रेकिङ प्रालिलाई प्रतिवादी बनाइएको छ ।

केन्द्रीय अनुसन्धान ब्युरो (सीआईबी) को अनुसन्धानअनुसार प्रतिवादीहरूले नेपाल ट्रस्टको दरबारमार्गस्थित एक रोपनी १४ आना जग्गा लिज प्रक्रियामा गम्भीर अनियमितता गरेका थिए । प्रारम्भमा नेपाल ट्रस्टलाई ६ अर्ब ४५ करोड ६६ लाख ३७ हजार ९९४ रुपैयाँ ३१ पैसा दिने प्रस्ताव स्वीकार गर्न सिफारिस गरिएको भए पनि अन्ततः १ अर्ब ५९ करोड ४० लाख ५२ हजार २०४ रुपैयाँ ६० पैसामै सम्झौता गरिएको खुलेको छ ।

अनुसन्धानका क्रममा २०७४ जेठ १४ गते भाडाबापत १ अर्ब ४० करोड १० लाख ८६ हजार ७७ रुपैयाँ र निर्माण खर्चबापत १९ करोड २९ लाख ६५ हजार ९२७ रुपैयाँ ६० पैसा गरी कुल १ अर्ब ५९ करोड ४० लाख ५२ हजार २०४ रुपैयाँ ६० पैसामा सम्झौता गरिएको पाइएको छ । उक्त सम्झौता प्रचलित नियम र कानुनविपरीत रहेको तथा नेपाल ट्रस्टलाई ठूलो आर्थिक क्षति पुर्‍याइएको सीआईबीको निष्कर्ष छ ।

उक्त जग्गा काठमाडौँ महानगरपालिका–१, दरबारमार्गस्थित कित्ता नं. ४६०६ मा पर्ने १–१४–०–३–५६ क्षेत्रफलको हो, जुन नेपाल ट्रस्टको नाममा दर्ता कायम छ । नेपाल ट्रस्टको कार्यालय र थामसेर्कु ट्रेकिङ प्रालिबीच निर्माण अवधि तीन वर्षसहित ३० वर्षका लागि लिज सम्झौता गरिएको थियो ।

सीआईबीको अनुसन्धान प्रतिवेदनका आधारमा जिल्ला सरकारी वकिल कार्यालयले मुद्दा दायर गरेको हो । अदालतमा दर्ता गरिएको अभियोगपत्रमा तीन जना प्रतिवादीलाई पाँच वर्ष कैद सजायको माग गरिएको छ ।

प्रकाशित मिति: बुधबार, पुस २, २०८२ १८:०४