काभ्रेपलाञ्चोक, बेथानचोक –
काभ्रेको दक्षिणी क्षेत्रमा अवस्थित बेथानचोक गाउँपालिका–१, च्याम्राङ्गबेँसीमा रहेको प्रसिद्ध तीनतले झरनाको पुनर्निर्माण कार्य सुरु भएको छ। गत वर्षको बाढीपहिरोले झरनालाई क्षति पुर्याएपछि गाउँपालिका कार्यालयले तत्काल पुनर्निर्माण थाल्ने निर्णय गरेको हो।
तीनतले झरना, जसले प्राकृतिक सौन्दर्यको अनुपम दृष्टान्त प्रस्तुत गर्छ, विगत केही वर्षयता पर्यटकहरूको आकर्षणको केन्द्र बनेको छ। बागमती प्रदेश सरकार, गाउँपालिका कार्यालय र अन्य संस्थाहरूको साझेदारीमा केही वर्षअघि झरनामा थप संरचना निर्माण गर्न ३५ लाख रुपैयाँ लगानी गरिएको थियो। यसपटक गाउँपालिकाले १० लाख रुपैयाँ बजेट छुट्याएर पोखरी र भत्किएका संरचना पुनर्निर्माण गरिरहेको छ। वडाध्यक्ष मधुसुधन तिमल्सिनाका अनुसार, “यो झरनामा बाढीले क्षति पुर्याए पनि पर्यटकको आकर्षण देखिएपछि चालु आर्थिक वर्षमा पुनर्निर्माण थालिएको हो।”
झरना आज पनि आन्तरिक पर्यटकहरूको आकर्षणको केन्द्र बनेको छ। विशेषगरी बिदाका दिनमा पर्यटकहरूको भिड देख्न पाइन्छ। चारैतिर पहाडले घेरिएको रमणीय बस्ती च्याम्राङ्गबेँसीको च्यालम–फाइमराङबीचको यो झरनामा बर्सेनि पर्यटक बढ्दै आएको वडाध्यक्ष तिमल्सिनाले बताए। यसअघि झरनाबाट झरेको पानीमा पौडी पोखरी निर्माण गरिएको थियो भने घेराबार र सिँढी निर्माण गरी तल्लाहरू अवलोकन गर्न सजिलो बनाइएको थियो।
महाभारत पर्वत शृङ्खलाको जंगल–मुहान रहेको चिसो पानीको झरना तीन तल्लामा बगेको हुनाले यसलाई ‘तीनतले झरना’ भनिएको छ। यहाँको चिसो, कञ्चन र शुद्ध पानीमा पौडी खेल्न सकिने सुविधा पर्यटकको मुख्य आकर्षण बनेको छ। झरना अवलोकनका साथै केही दिन बस्न चाहने पर्यटकहरू काभ्रेको बनेपा, धुलिखेल र पनौतीबाट ट्राभल प्याकेज बनाएर आउने गरेका छन्। सामाजिक सञ्जालमा खिचिएका तस्वीर र भिडियोहरू पोस्ट गर्ने चलनले पनि यहाँको लोकप्रियता बढाएको छ।
स्थानीय होटल–लजहरूले झरना पुगेका पर्यटकका लागि सुविधा प्रदान गरिरहेका छन्। साथै, बाहिरी जिल्लाबाट आउनेहरूले स्थानीय मौलिक खानामा पनि रुचि देखाएका छन्। खुवा, मह, तरकारी, मकैको ढिँडो, गुन्द्रुकजस्ता परम्परागत खानाका व्यापारले पनि स्थानीय अर्थतन्त्रलाई सघाएको छ।
झरना पुग्ने मार्गमा विभिन्न विकल्प छन्। पनौती बसपार्कबाट करिब २५ किलोमिटर सडक यात्रा गर्दा पनौती–ढुर्खक १३ किलोमिटर पक्की तथा ग्राभेल सडक र त्यसपछिको १२ किलोमिटर उकालो–ओरालो मार्ग सहज रहेको छ। लालीगुराँस फूल्ने मौसममा यो मार्ग पर्यटकलाई विशेष मोहनी बनाउने गर्छ।
त्यसैगरी, ललितपुर जिल्लाको गोट्टीखेलबाट चन्दनपुर र कालेश्वर हुँदै झरना पुग्न सकिन्छ। करिब १० किलोमिटर उकालो–ओरालो सडक पक्की र केही कच्ची भएको भए पनि यात्रा कठिन छैन। हिउँदमा पनि बागमती प्रदेशको राजधानी हेटौँडासम्म पुग्ने बेथानचोक–फापरबारी सडक झरना नजिकैबाट जान्छ।
तीनतले झरना, पहाडी मनोरम दृश्य, स्वच्छ र चिसो पानीको पोखरीसँगै पौडी खेल्ने सुविधा र स्थानीय खानाका विकल्पले पर्यटकहरूको लागि एक आदर्श गन्तव्य बनेको छ। गाउँपालिकाको पहल र स्थानीय व्यवसायीको सक्रियताले झरनाको सुन्दरता संरक्षण तथा पर्यटन प्रवर्द्धन दुवै सुनिश्चित गरेको छ।
