कोरला नाका जोड्ने घमी खोला पुल अन्तिम चरणमा

विविध

गृहपृष्ठ
विविध

निर्माणाधीन पुल कोरला नाका जोड्ने घमी खोला पुल अन्तिम चरणमा

नेपालकभर बुधबार, पुस ९, २०८२

मुस्ताङ

नेपाल–चीन सीमा जोड्ने कोरला नाकातर्फको प्रमुख पूर्वाधारका रूपमा रहेको माथिल्लो मुस्ताङको लोघेकर दामोदरकुण्ड गाउँपालिका–२ स्थित घमी खोला पुल निर्माण अन्तिम चरणमा पुगेको छ। कालीगण्डकी करिडोर (बेनी–जोमसोम–कोरला) सडक आयोजनाअन्तर्गत निर्माणाधीन पुलको भौतिक प्रगति ८० प्रतिशत पुगेको र चालु आर्थिक वर्षमै सम्पन्न गर्ने लक्ष्यसहित काम भइरहेको आयोजनाले जनाएको छ।

एक स्पानको ४० मिटर लम्बाइको उक्त पुल निर्माणका लागि हिमढुङ ठोक्कर एण्ड इमोटल जेभीसँग २०७५ साल पुस १९ गते रु ६ करोड ८० लाख लागतमा ठेक्का सम्झौता भएको थियो। सम्झौताअनुसार पुल २०७८ पुस ९ गतेभित्र सम्पन्न हुनुपर्ने थियो।

गाउँपालिका अध्यक्ष लोप्साङ छोम्फेल विष्टका अनुसार सडकको काम सम्पन्न भइसके पनि पुल निर्माण ढिलाइ हुँदा सवारीसाधन सञ्चालनमा समस्या हुँदै आएको थियो। घमी खोला पुल सम्पन्न भएपछि आवागमन सहज हुने उनको भनाइ छ।

निर्माण कम्पनीले प्रतिकूल मौसम र हिमपातलाई कारण देखाउँदै लामो समय काम अलपत्र पारेको थियो। पटक–पटक ताकेता गर्दा पनि कार्यस्थलमा नफर्किएपछि आयोजनाले छ महिनाको अल्टिमेटमसहित लागतको ०.०५ प्रतिशत दैनिक हर्जाना तोकेको थियो।

आयोजना प्रमुख तेजस्वी शर्माका अनुसार बेनी–जोमसोम–कोरला सडकखण्डमा हालसम्म १४ वटा पुल सम्पन्न भइसकेका छन्। माथिल्लो मुस्ताङको घमी खोला पुल पनि चालु आर्थिक वर्षमै सम्पन्न हुने उनले जानकारी दिए।

प्रकाशित मिति: बुधबार, पुस ९, २०८२ ०७:५५