कांग्रेसका महामन्त्रीद्वय विशेष महाधिवेशन तत्काल गर्नुपर्नेमा अडिग

राजनीति

गृहपृष्ठ
राजनीति

कांग्रेसका महामन्त्रीद्वय विशेष महाधिवेशन तत्काल गर्नुपर्नेमा अडिग

नेपालकभर शुक्रबार, पुस ११, २०८२

नेपाली कांग्रेसका महामन्त्रीद्वय गगन थापा र विश्वप्रकाश शर्मा पुस महिनाभित्रै विशेष महाधिवेशन गर्नुपर्नेमा स्पष्ट रूपमा उभिएका छन्। शुक्रबार विशेष महाधिवेशन पक्षधर समूहले बुझाएको ज्ञापनपत्र ग्रहण गर्दै उनीहरूले नियमित महाधिवेशन सम्भव नभएकाले विशेषको विकल्प नरहेको बताएका हुन्।

महामन्त्री थापाले ५४ प्रतिशत प्रतिनिधिले हस्ताक्षर गरेर राखेको मागलाई सम्मान गर्नुपर्ने आवश्यकता औँल्याउँदै भने, “हामीले निरन्तर नियमित महाधिवेशनको पक्षमा रहेरै बोलेका थियौँ। पुसभित्रै नियमित महाधिवेशन भएको भए प्रतिनिधिहरूको माग सम्बोधन हुनेथियो। अब त्यो सम्भावना नदेखिएपछि विशेष महाधिवेशन अनिवार्य बनेको छ। यही पुसमै गर्नुपर्छ, यसको कार्यान्वयनबारे केन्द्रीय तहमा छलफल गरेर निष्कर्षमा पुग्छौँ।”

यस्तै अर्का महामन्त्री विश्वप्रकाश शर्माले पनि विधानअनुसारको प्रक्रिया अघि बढाउनुपर्नेमा जोड दिए। उनका अनुसार ५४ प्रतिशत हस्ताक्षरसहित आएको प्रस्तावलाई रोक्नु उचित हुँदैन। “अब विषय पार्टीका बैठकमा राखेर औपचारिक प्रक्रियामा लैजानुपर्छ,” उनले बताए।

यता, कार्यसम्पादन समितिको बैठक भइरहेका बेला महामन्त्रीद्वय ज्ञापनपत्र स्वीकार गर्न बाहिर निस्किएका थिए। अब विशेष महाधिवेशनका कार्यसूची र कार्यतालिका निर्धारणका विषय कार्यसम्पादन समितिमा प्रस्ताव स्वरूप प्रस्तुत हुने बताइएको छ।

कांग्रेसले १५औँ महाधिवेशनअन्तर्गत दुई दिनपछि वडा तहको अधिवेशन सुरु गर्ने तयारी गरेको छ। तर क्रियाशील सदस्यता विवाद समाधान नभएकाले महाधिवेशनको सम्पूर्ण प्रक्रिया अन्योलमा परेको कांग्रेस भित्रैको असन्तुष्टि चुलिएको छ।

प्रकाशित मिति: शुक्रबार, पुस ११, २०८२ १७:११