काठमाडौँका यी स्थानमा काटिँदैछ बिजुली

समाचार

गृहपृष्ठ
समाचार

काठमाडौँका यी स्थानमा काटिँदैछ बिजुली

नेपालकभर शनिबार, पुस १२, २०८२

काठमाडौँ : नेपाल विद्युत् प्राधिकरणले आज काठमाडौँका केही क्षेत्रमा अस्थायी रूपमा विद्युत् आपूर्ति अवरुद्ध हुने जनाएको छ। प्राधिकरणले जारी गरेको सूचनाअनुसार पानीपोखरी फिडर र हस्पिटल फिडर अन्तर्गतका विभिन्न स्थानमा आज बिहान ११ बजेदेखि अपराह्न १ बजेसम्म बिजुली कटौती हुनेछ।

विद्युत् प्राधिकरणका अनुसार लाजिम्पाट, पानीपोखरी, महाराजगञ्ज तथा त्रिभुवन विश्वविद्यालय शिक्षण अस्पताल आसपासका क्षेत्रमा विद्युत् सेवा अवरुद्ध हुनेछ। यस्तै, राष्ट्रपति भवन, नेपाल प्रहरीको केन्द्रीय अनुसन्धान ब्युरो (CIB) तथा नेपाल प्रहरी अस्पताल आसपासका क्षेत्रमा पनि विद्युत् कटौती हुने महाराजगञ्ज वितरण केन्द्रले जनाएको छ।

काठमाडौँ उपत्यका मध्य तथा उत्तर वितरण प्रणाली सुदृढीकरण आयोजनाअन्तर्गत वितरण प्रणालीलाई भूमिगत बनाउने कार्य भइरहेको र भूमिगत कार्य सम्पन्न भइसकेका केबलहरू जोड्ने प्रयोजनका लागि अस्थायी रूपमा विद्युत् आपूर्ति बन्द गर्न लागिएको प्राधिकरणले स्पष्ट पारेको छ।

सूचनामा उल्लेख भएअनुसार निर्धारित कार्य समयभन्दा अगावै सम्पन्न भएमा सो समयअघि नै विद्युत् आपूर्ति पुनः सुचारु गरिनेछ।

प्रकाशित मिति: शनिबार, पुस १२, २०८२ ०९:५२