रौतहटमा प्रतिनिधिसभा निर्वाचनका लागि १८ मतदान केन्द्र थप

राजनीति

गृहपृष्ठ
राजनीति

निर्वाचनमा मतदाता रौतहटमा प्रतिनिधिसभा निर्वाचनका लागि १८ मतदान केन्द्र थप मतदाता संख्या बढेसँगै एक मतदानस्थलसहित केन्द्र विस्तार, फागुन २१ मा निर्वाचन

नेपालकभर सोमबार, पुस १४, २०८२

चन्द्रपुर (रौतहट) ।

आसन्न प्रतिनिधिसभा निर्वाचनलाई लक्षित गर्दै रौतहट जिल्लामा एक मतदानस्थलसहित १८ वटा मतदान केन्द्र थप गरिएका छन्। आगामी फागुन २१ गते हुने निर्वाचनमा मतदातालाई थप सहजता प्रदान गर्ने उद्देश्यले केन्द्र र स्थल विस्तार गरिएको जिल्ला निर्वाचन कार्यालयले जनाएको छ।

जिल्ला निर्वाचन कार्यालय रौतहटका प्रमुख छोटेलाल दासका अनुसार २०७९ सालको प्रतिनिधिसभा निर्वाचनमा जिल्लामा ५२३ मतदान केन्द्र रहेकामा यसपटक १८ वटा थपिएर ५४१ केन्द्र कायम भएका छन्। त्यसैगरी, २०७९ को निर्वाचनमा २७६ मतदानस्थल रहेकामा यसवर्ष एक स्थल थप गरी २७७ मतदानस्थल कायम गरिएको छ। नयाँ मतदानस्थल गरुडा नगरपालिका–६ मा थपिएको हो।

यस वर्ष जिल्लामा २१ हजार १५६ जना मतदाता थपिएका छन्। हाल रौतहटमा कुल ४ लाख ३६ हजार ६११ जना मतदाता रहेको जिल्ला निर्वाचन कार्यालयले जनाएको छ। मतदाता संख्या वृद्धि भएसँगै मतदानस्थल र मतदान केन्द्र पनि थप गरिएको प्रमुख दासले जानकारी दिए।

२०७९ को प्रतिनिधिसभा निर्वाचनमा जिल्लामा ४ लाख १५ हजार ४५५ जना मतदाता रहेका थिए। सो निर्वाचनमा कुल मतदातामध्ये २ लाख ८२ हजार ४३० जनाले मतदान गरेका थिए।

दुई गाउँपालिका र १६ नगरपालिका रहेको रौतहट जिल्लामा चार वटा प्रतिनिधिसभा निर्वाचन क्षेत्र रहेका छन् भने जिल्लामा कुल १५७ वटा वडा छन्। २०७९ को निर्वाचनमा क्षेत्र नं १ बाट तत्कालीन नेकपा (एकीकृत समाजवादी) का माधवकुमार नेपाल, क्षेत्र नं २ बाट स्वतन्त्र उम्मेदवार किरण साह, क्षेत्र नं ३ बाट आजपा अध्यक्ष प्रभु साह र क्षेत्र नं ४ बाट नेपाली कांग्रेसका देवप्रसाद तिमल्सिना निर्वाचित भएका थिए।

प्रकाशित मिति: सोमबार, पुस १४, २०८२ ११:०३