रास्वपाको समानुपातिक सूचीमा कलाकार प्रकाश सपुत

राजनीति

गृहपृष्ठ
राजनीति

राष्ट्रिय स्वतन्त्र पार्टी रास्वपाको समानुपातिक सूचीमा कलाकार प्रकाश सपुत देश विकासमा योगदान दिने उद्देश्यसहित राजनीतिमा प्रवेश गरेको प्रकाश सपुतको भनाइ, ‘प्रश्न मात्रै होइन, अब जवाफ दिने ठाउँमै पुग्न चाहें।’

नेपालकभर मंगलबार, पुस १५, २०८२

काठमाडौँ ।

प्रतिनिधिसभा निर्वाचनका लागि राष्ट्रिय स्वतन्त्र पार्टी (रास्वपा) को समानुपातिक उम्मेदवारको बन्दसूचीमा कलाकार प्रकाश सपुत पनि परेका छन् । रास्वपाले सोमबार सपुतसहित ११० जनाको नाम निर्वाचन आयोगमा पेस गरेको हो ।

समानुपातिक सूचीमा परेको विषयमा कान्तिपुरसँग प्रतिक्रिया दिँदै प्रकाश सपुतले सरकार र नेपाली राजनीतिप्रति गुनासो मात्रै गरेर नबस्ने निर्णय गर्दै संसदीय प्रक्रिया नजिकबाट बुझ्न र देश विकासमा योगदान दिन राजनीतिमा प्रवेश गरेको बताए । ‘जहिल्यै आलोचना मात्रै गरिरहनुभन्दा अब जिम्मेवारी बोकेर जवाफ दिने ठाउँमै पुग्ने सोच बनाएको हुँ,’ उनले भने ।

३५ वर्षका प्रकाशका अनुसार उमेरको उत्तरार्द्धमा कलाकारको जीवन निराशातर्फ ढल्किने अवस्था देखिएकाले त्यो ऊर्जा र सोच देशसँग जोड्ने उद्देश्यले राजनीतिमा पाइला चालेका हुन् । कलाकारितामार्फत पनि उनले राजनीतिज्ञ र सामाजिक बेथितिमाथि प्रश्न उठाउँदै आएका थिए ।

‘यो निर्णय महत्त्वाकांक्षाभन्दा पनि जिम्मेवारीको महसुस हो । कम्तीमा राजनीति फोहोरी खेल हो भन्ने धारणा बदल्न योगदान दिन चाहेको हुँ,’ प्रकाशले बताए । काठमाडौं महानगरपालिकाका प्रमुख बालेन्द्र शाहको सक्रियता र रास्वपाका सभापति रवि लामिछानेको राजनीतिक अभ्यासबाट आफू प्रभावित भएको उनले उल्लेख गरे ।

रास्वपाको उदयसँगै प्रकाश राजनीतिमा आउने–नआउने विषयमा औपचारिक र अनौपचारिक छलफलमा सहभागी हुँदै आए पनि पारिवारिक जिम्मेवारी र कलाकारिताका कारण तत्काल निर्णय लिन नसकेको बताए । तर जेन–जी आन्दोलन र नयाँ राजनीतिक शक्तिको उदयपछि आफूलाई यो समय उपयुक्त लागेको उनको भनाइ छ ।

अभिनय र संगीत क्षेत्रमा सक्रिय प्रकाशले अब कलाकारिता र राजनीतिलाई सँगसँगै अघि बढाउने योजना बनाएका छन् । उनको अभिनय रहेको चलचित्र ‘मिरमिरे’ माघमा प्रदर्शनमा आउने तयारीमा छ भने वैशाखमा ‘परालको आगो’ रिलिज हुँदैछ ।

१५ वर्षदेखि संगीत क्षेत्रमा सक्रिय प्रकाश सपुतका ‘गलबन्दी’, ‘पीर’, ‘सकम्बरी’, ‘बोल माया’, ‘दमाई महाराजा’लगायतका गीतहरू लोकप्रिय छन् ।

प्रकाशित मिति: मंगलबार, पुस १५, २०८२ १०:४९