सुनसरीको कोशी गाउँपालिकामा गोली लागेर एक जनाको मृत्यु

जीवन शैली

गृहपृष्ठ
जीवन शैली

गोली लाग्दा एक स्थानीयको मृत्यु सुनसरीको कोशी गाउँपालिकामा गोली लागेर एक जनाको मृत्यु सीमावर्ती क्षेत्रको पुरी टोलमा सिटी सफारी चालकलाई लक्षित गरी गोली प्रहार, घटनापछि तनाव

नेपालकभर बिहीबार, पुस १७, २०८२

विराटनगर ।

सुनसरीको सीमावर्ती कोशी गाउँपालिका–१ स्थित पुरी टोलमा गोली लाग्दा एक स्थानीयको मृत्यु भएको छ। सशस्त्र प्रहरीको बेस क्याम्प लौकही नजिक भएको उक्त घटनामा ४५ वर्षीय विजय साहको ज्यान गएको हो।

जिल्ला प्रहरी कार्यालय सुनसरीका प्रवक्ता चन्द्रबहादुर खड्काका अनुसार नेपाल–भारत सीमा नजिक सिटी सफारीमा सामान ल्याउँदै गर्दा चालकलाई लक्षित गरी गोली चलाइएको प्रारम्भिक अनुसन्धानबाट खुलेको छ। गोली लागेर गम्भीर घाइते भएका साहको उपचारका क्रममा मृत्यु भएको प्रहरीले जनाएको छ।

प्रहरीले घटनास्थलबाट गोलीको खोका बरामद गरेको छ। घटनाको प्रकृति तथा गोली कसले चलायो भन्ने विषयमा विस्तृत अनुसन्धान भइरहेको जिल्ला प्रहरी कार्यालयले जानकारी दिएको छ।

घटनालगत्तै स्थानीयबासी र मृतकका आफन्तले सशस्त्र प्रहरीबाट गोली चलेको आशंका गर्दै प्रदर्शन सुरु गरेका छन्। उनीहरूले घटनाको सत्यतथ्य छानबिन गर्न र दोषीमाथि कडा कारबाही गर्न माग गर्दै नाराबाजी गरेका छन्।

स्थिति तनावपूर्ण बन्दै गएपछि स्थानीय प्रशासनले सुरक्षा व्यवस्था कडा पारेको छ। प्रहरीले घटनास्थललाई नियन्त्रणमा लिँदै थप अनुसन्धान अघि बढाएको जनाएको छ।

प्रकाशित मिति: बिहीबार, पुस १७, २०८२ १३:१०