नेपाली कांग्रेसको १५औं महाधिवेशन वैशाख २८

राजनीति

गृहपृष्ठ
राजनीति

महाधिवेशन नेपाली कांग्रेसको १५औं महाधिवेशन वैशाख २८–३१ मा गर्ने प्रस्ताव पारित

नेपालकभर शुक्रबार, पुस १८, २०८२

१८ पुस, काठमाडौं । नेपाली कांग्रेसको १५औं महाधिवेशन आगामी वैशाख २८ गतेदेखि ३१ गतेसम्म गर्ने प्रस्ताव पारित भएको छ। जारी केन्द्रीय कार्यसम्पादन समितिको बैठकमा कार्यवाहक सभापति पूर्णबहादुर खड्काले पेस गरेको प्रस्ताव सर्वसम्मत रूपमा पारित भएको हो। बैठकपछि नेता डा. शशांक कोइरालाले पत्रकारहरूसँग संवाद गर्दै महाधिवेशनको मिति औपचारिक रूपमा तय भएको जानकारी दिएका छन्।

यसअघि पुस २६ देखि २८ गतेसम्म महाधिवेशन आयोजना गर्ने प्रारम्भिक तालिका सार्वजनिक गरिएको थियो। तर विभिन्न आन्तरिक राजनीतिक परिस्थिति, समय व्यवस्थापन तथा दलभित्र उत्पन्न मतभेदका कारण सो तालिका प्रभावित हुँदा निर्धारित कार्यक्रम अघि बढ्न सकेको थिएन। कांग्रेसभित्रको पछिल्लो गतिविधिले नेतृत्व, संगठनात्मक व्यवस्थापन तथा आगामी राजनीतिक रोडम्यापबारे पुनर्विचार गर्नुपर्ने आवश्यकता देखिएपछि नयाँ मितिको प्रस्ताव अघि सारिएको हो।

महाधिवेशन तालिका प्रभावित भएपछि महामन्त्रीद्वय गगनकुमार थापा र विश्वप्रकाश शर्माले पार्टीलाई ताजा म्यान्डेट दिलाउनुपर्ने आवश्यकता औंल्याउँदै विशेष महाधिवेशनको विकल्पसमेत अघि सारेका थिए। उनीहरूले पार्टीभित्रको असन्तोष, संगठन पुनर्संरचना तथा नेतृत्वप्रतिको जनअपेक्षा सम्बोधन गर्न विशेष महाधिवेशन आवश्यक रहेको तर्क गर्दै तयारी समेत थालेका थिए।

यही परिस्थितिमा कार्यवाहक सभापति पूर्णबहादुर खड्काले नियमित महाधिवेशनलाई नै अघि बढाउँदै दलभित्रको विवाद न्युनिकरण गर्ने उद्देश्यसहित नयाँ प्रस्ताव पेस गरेका थिए। खड्काले प्रस्तुत गरेको प्रस्ताव केन्द्रीय समितिमा बहुमत समर्थन पाएपछि कांग्रेसले अब निर्धारित मिति वैशाख २८ देखि ३१ गतेसम्म नै १५औं महाधिवेशन सम्पन्न गर्ने तयारीलाई औपचारिकता दिएको छ।

पार्टी नेतृत्वले महाधिवेशनलाई संगठन सुदृढीकरण, आन्तरिक लोकतन्त्र बलियो बनाउने अवसरका रूपमा लिएको बताइएको छ। महाधिवेशनमार्फत नीतिगत दिशा, संगठनात्मक संरचना तथा आगामी राजनीतिक रणनीति तय हुने अपेक्षा गरिएको छ।

प्रकाशित मिति: शुक्रबार, पुस १८, २०८२ १८:११