अमेरिकामाथि आक्रमणको आरोप लगाउँदै भेनेजुएलामा राष्ट्रव्यापी आपतकाल घोषणा

अन्तर्राष्ट्रिय

गृहपृष्ठ
अन्तर्राष्ट्रिय

आपतकाल घोषणा अमेरिकामाथि आक्रमणको आरोप लगाउँदै भेनेजुएलामा राष्ट्रव्यापी आपतकाल घोषणा

नेपालकभर शनिबार, पुस १९, २०८२

कराकस

भेनेजुएलाले आफ्नै भूमिमा संयुक्त राज्य अमेरिकाले सैन्य आक्रमण गरेको आरोप लगाउँदै देशभर आपतकाल घोषणा गरेको छ। शनिबार बिहान राजधानी कराकससहित मिरान्डा, अरागुवा र ला ग्वाइरा राज्यका विभिन्न स्थानमा एकैचोटि विस्फोट भएको भेनेजुएली अधिकारीहरूले जनाएका छन्।

राष्ट्रपति निकोलस मादुरोले ती घटनालाई “अत्यन्त गम्भीर विदेशी सैन्य आक्रमण” को संज्ञा दिँदै राष्ट्रिय सुरक्षा संयन्त्र पूर्ण रूपमा परिचालनमा ल्याउने आदेश दिएका छन्। उनले रक्षा बलहरूलाई तयारी अवस्थामा रहन निर्देशन दिँदै आवश्यकताअनुसार सबै राष्ट्रिय सुरक्षा योजना तत्काल लागू गर्न भनिएको छ।

भेनेजुएली सरकारद्वारा जारी वक्तव्यमा “देशको सार्वभौमिकता र सुरक्षाका लागि जनतालाई एकजुट हुन” आह्वान गरिएको छ। साथै संयुक्त राष्ट्रसंघको सुरक्षा परिषद्, महासचिव तथा अन्य अन्तर्राष्ट्रिय संयन्त्रमा औपचारिक उजुरी दर्ता गरी अमेरिकामाथिको “आक्रमण” को अन्तर्राष्ट्रिय भर्त्सना गराउन पहल गर्ने जनाएको छ।

ह्वाइट हाउस र पेन्टागनले भने भेनेजुएलाको आरोपबारे अहिलेसम्म कुनै टिप्पणी गरेका छैनन्। अमेरिकाले यद्यपि लामो समयदेखि मादुरो सरकारमाथि मानवअधिकार उल्लंघन, चुनावी धाँधली र लागुऔषध कारोबारमा संलग्नताको आरोप लगाउँदै सत्ता परिवर्तन आवश्यक रहेको भनाइ दोहोर्याउँदै आएको छ।

भेनेजुएलाले ती आरोप अस्वीकार गर्दै अमेरिकाले आफ्नो तेल स्रोतमा पहुँच जमाउन सरकार परिवर्तन गराउने प्रयास गरिरहेको दाबी गर्दै आएको छ। पछिल्लो समय क्यारेबियन क्षेत्रमा अमेरिकी सैन्य सक्रियता, प्रतिबन्धित जहाजमाथि कडा अवरोध र नियन्त्रण कारबाहीले दुई देशबीचको तनाव झन् तीव्र बनेको देखिएको छ।

प्रकाशित मिति: शनिबार, पुस १९, २०८२ १४:३३