ऊर्जामन्त्री कुलमान घिसिङद्वारा राजीनामा, सक्रिय राजनीतिमा प्रवेशको घोषणा

समाचार

गृहपृष्ठ
समाचार

राजीनामा ऊर्जामन्त्री कुलमान घिसिङद्वारा राजीनामा, सक्रिय राजनीतिमा प्रवेशको घोषणा

नेपालकभर बिहीबार, पुस २४, २०८२

काठमाडौँ ।
ऊर्जा, जलस्रोत तथा सिँचाइ मन्त्री कुलमान घिसिङले मन्त्री पदबाट राजीनामा दिएका छन्। हिजो साँझ प्रधानमन्त्री निवास बालुवाटार पुगेर प्रधानमन्त्री सुशीला कार्कीसमक्ष राजीनामा पत्र बुझाउँदै घिसिङले पद त्याग गरेका हुन्। उनीले भौतिक पूर्वाधार तथा यातायात र शहरी विकास मन्त्रालयको जिम्मेवारी समेत सम्हाल्दै आएका थिए।

घिसिङ भदौ ३० गते मन्त्री नियुक्त भएका थिए। राष्ट्रिय स्वतन्त्र पार्टी (रास्वपा) को उपसभापति बन्ने सहमतिपछि उनीमाथि वर्तमान गैरदलीय सरकारबाट राजीनामा दिन दबाब बढेको थियो। त्यही क्रमको निरन्तरतामा उनले पदबाट हट्ने निर्णय लिएका हुन्।

मन्त्री पदबाट बाहिरिएपछि आयोजित पत्रकार सम्मेलनमा घिसिङले आफूले देश र नागरिकलाई प्राथमिकता दिएर काम गर्ने प्रयास गरेको दाबी गरे। राजीनामा व्यक्तिगत स्वार्थ वा जिम्मेवारीबाट उम्किन गरिएको होइन, बरु आत्मसम्मान, नैतिकता र सिद्धान्तप्रतिको प्रतिबद्धताको निरन्तरता भएको उनले स्पष्ट पारे।

उनले उज्यालो नेपाल पार्टी र रास्वपाबीच भएको सहमतिमा आफ्नो नाम उल्लेख भए पनि उक्त सहमति औपचारिक रूपमा कार्यान्वयन नभएको बताए। समर्थन र सद्भाव रहेको भए पनि अहिलेसम्म कुनै पार्टीको औपचारिक सदस्यता नलिएको समेत घिसिङको दाबी छ। यद्यपि उनले अब औपचारिक रूपमा सक्रिय राजनीतिक जीवन सुरू हुने संकेत दिएका छन्।

राजीनामापछि ऊर्जा क्षेत्रको नेतृत्व कसले सम्हाल्ने भन्ने प्रश्न उठेको छ भने राजनीतिक वृत्तमा घिसिङको आगामी भूमिकाप्रति चासो बढेको छ।

प्रकाशित मिति: बिहीबार, पुस २४, २०८२ ०६:१६