गोर्खा–२ मा एमालेले ‘चक्रे मिलन’लाई उम्मेदवार बनायो

राजनीति

गृहपृष्ठ
राजनीति

गुण्डागर्दी पृष्ठभूमिका मिलन गुरुङलाई एमालेको टिकट गोर्खा–२ मा एमालेले ‘चक्रे मिलन’लाई उम्मेदवार बनायो

नेपालकभर सोमबार, माघ ६, २०८२

मिलन गुरुङ ‘चक्रे मिलन’

काठमाडौं।

नेकपा एमालेले गोर्खा निर्वाचन क्षेत्र नम्बर–२ बाट प्रतिनिधिसभा सदस्यको प्रत्यक्षतर्फको उम्मेदवारमा मिलन गुरुङ ‘चक्रे मिलन’ लाई अघि सारेको छ ।

शनिबार बसेको एमालेको सचिवालय बैठकले गुरुङलाई उम्मेदवार बनाउने निर्णय गरेको हो । उनले माघ ६ गते गोर्खा पुगेर उम्मेदवारी दर्ता गराउने कार्यक्रम रहेको एमालेले जनाएको छ ।

२०७९ को चुनावमै उम्मेदवार बनाउने तयारी गरिए पनि अन्तिम समयमा रोकिएका गुरुङलाई यसपटक टिकट दिइएको हो । त्यसबेला गोर्खा एमालेले गुरुङसहित दिनेशचन्द्र देवकोटा र कोपिला कुमालको नाम सिफारिस गरेको थियो । तर, केन्द्रले सबैको नाम हटाएर अब्दुस सलाम मिया लाई उम्मेदवार बनाएको थियो । मिया पराजित भएपछि गोर्खा–२ बाट तत्कालीन माओवादी केन्द्रका अध्यक्ष पुष्पकमल दाहाल ‘प्रचण्ड’ निर्वाचित भएका थिए ।

चक्रे मिलनको पृष्ठभूमि भने विवादास्पद छ । उनी विगत तीन दशकदेखि विभिन्न आपराधिक गतिविधिमा संलग्न रहेको आरोपमा पटक–पटक पक्राउ पर्दै आएका छन् । प्रहरी अभिलेखअनुसार उनी पहिलोपटक २०४६ साउन ६ गते पक्राउ परेका थिए । त्यसयता सार्वजनिक अपराध, ज्यान मार्ने उद्योग, अभद्र व्यवहार, लागुऔषध लगायतका मुद्दामा पटक–पटक पक्राउ परेका छन् ।

पछिल्लो पटक २०८२ साउनमा महाराजगञ्जस्थित होटल साम्बालामा होहल्ला गरेको आरोपमा उनीसहित १९ जना पक्राउ परेका थिए ।

गुण्डागर्दी पृष्ठभूमिबाट राजनीतिमा आएका व्यक्तिमध्ये गुरुङ एक्ला होइनन् । उनका समकालीन राजीव गुरुङ ‘दीपक मनाङे’ पनि राजनीतिमा सक्रिय थिए । तर, चक्रे मिलनमाथि खुकुरी प्रहार गरेको अभियोगमा दोषी ठहर भई हाल डिल्लीबजार कारागारमा रहेका मनाङे आगामी फागुनमा जेलमुक्त हुनेछन् । तर, फौजदारी कसुरमा दोषी ठहर भएकाले उनी ६ वर्षसम्म राजनीतिक लाभ लिन नपाउने छन् ।

यसपटक गोर्खा–२ बाट चुनाव जितेमा चक्रे मिलन संघीय संसद् पुग्नेछन्

प्रकाशित मिति: सोमबार, माघ ६, २०८२ १०:०५