ट्रम्प–जेलेन्स्की भेट सकारात्मक, शान्ति प्रयास तीव्र हुने संकेत

अन्तर्राष्ट्रिय

गृहपृष्ठ
अन्तर्राष्ट्रिय

ट्रम्प–जेलेन्स्की भेट सकारात्मक, शान्ति प्रयास तीव्र हुने संकेत

नेपालकभर शुक्रबार, माघ १०, २०८२

काठमाडौँ । अमेरिकी राष्ट्रपति डोनाल्ड ट्रम्प र युक्रेनी राष्ट्रपति भोलोदिमिर जेलेन्स्कीबीच स्विट्जरल्यान्डको डाभोसमा भएको भेटवार्ता सकारात्मक रूपमा सम्पन्न भएको छ। विश्व आर्थिक मञ्च (वर्ल्ड इकोनोमिक फोरम) को वार्षिक बैठकका क्रममा भएको यस भेटलाई रुस–युक्रेन युद्ध अन्त्यतर्फको कूटनीतिक पहलका रूपमा हेरिएको छ।

भेटपछि पत्रकारहरूसँग कुरा गर्दै राष्ट्रपति ट्रम्पले जेलेन्स्कीसँगको संवाद ‘निकै राम्रो’ भएको प्रतिक्रिया दिएका छन्। ह्वाइट हाउसका अनुसार करिब एक घण्टा चलेको उक्त बैठकमा रुस–युक्रेन युद्धको वर्तमान अवस्था, युद्धविरामका सम्भावना र शान्ति प्रक्रियाका उपायबारे गहन छलफल भएको थियो।

राष्ट्रपति ट्रम्पले लामो समयदेखि जारी युद्ध अब अन्त्य हुनुपर्नेमा जोड दिँदै अमेरिकी प्रतिनिधिमण्डल रूसी राष्ट्रपति भ्लादिमिर पुटिनसँग भेट गर्न मस्को जान लागेको जानकारी पनि दिएका छन्। उनले यसलाई युद्धविरामको प्रयासमा महत्वपूर्ण कूटनीतिक कदमका रूपमा व्याख्या गरेका छन्।

युक्रेनी राष्ट्रपति जेलेन्स्कीले पनि ट्रम्पसँगको भेटलाई फलदायी र ‘राम्रो’ भन्दै प्रशंसा गरेका छन्। दुई नेताबीचको यो संवादले विश्व राजनीतिमा नयाँ तरङ्ग पैदा गरेको र युद्ध अन्त्यका लागि अमेरिकी सक्रियता बढेको सङ्केत दिएको विश्लेषकहरूको भनाइ छ।

प्रकाशित मिति: शुक्रबार, माघ १०, २०८२ ०७:५९