दोहोरो अंकले घट्यो शेयर बजार

अर्थ

गृहपृष्ठ
अर्थ

दोहोरो अंकले घट्यो शेयर बजार

नेपालकभर बिहीबार, असार ६, २०८१

काठमाडौं । साताको अन्तिम कारोबारको दिन बिहीबार शेयर बजार दोहोरो अकंले घटेको छ । बुधबार झिनो सुधार देखिएको शेयर बजार अन्तिम कारोबार दिन भने राताम्य हुनपुग्यो ।

नेपाल स्टक एक्सचेञ्ज (नेप्से) १०.४४ अकंले घटेर २०६८.३१ बिन्दुमा बन्द भयो । बिहीबार ३०६ कम्पनीको ८६ लाख ६३ हजार ६९९ कित्ता शेयर किनबेच हुँदा ३ अर्ब ८७ करोड ७ लाख ४४ हजार रुपैयाँको शेयर कारोबार भएको छ ।

बजार राताम्य हुँदा समेत फाइनान्सको शेयरमा लगानीकर्ता झुम्मिएका छन् । बिहीबार फाइनान्स समूहको १.८३ प्रतिशत र म्युचुअल फण्ड समूहको ०.१३ प्रतिशतले शेयर मूल्यमा सुधार देखियो । बिहीबार अन्य ११ उपसूचक भने राताम्य भएका छन् ।

यसदिन माउन्टेन इनर्जीको १७ करोड १४ लाख रुपैयाँको शेयर कारोबार भएको छ । लगानीकर्ता पर्ख र हेरको अवस्थामा रहेका छन् । शेयर बजारका लगानीकर्ताको मनोबल कमजोर हुँदै गइरहेको छ । सेबोनको अध्यक्ष नियुक्तिमा भइरहेको अन्योलले समेत पुँजी बजार प्रभावित भइरहेको छ ।

बैंकको ब्याजदर घट्दो क्रममा भएपनि मार्केटमा सुधार देखिएको छैन । बजार घटेपनि बिहीबार कारोबार भने बढेको छ । अब लगानीकर्ता मौद्रिक नीतिको पर्खाइमा रहेका छन् । नियामक निकायले लगानीकर्तालाई प्रोत्साहनको कार्यक्रम ल्याउनु आवश्यक रहेको छ ।

प्रकाशित मिति: बिहीबार, असार ६, २०८१ १५:२८