शेयर बजारका लगानीकर्ता प्रचण्डलाई विदा गर्न आतुर, नेप्से २२ सयको विन्दुमा उक्लियो

अर्थ

गृहपृष्ठ
अर्थ

शेयर बजारका लगानीकर्ता प्रचण्डलाई विदा गर्न आतुर, नेप्से २२ सयको विन्दुमा उक्लियो

नेपालकभर बिहीबार, असार २७, २०८१

काठमाडौं । वर्तमान सरकारको वहिर्गमनपूर्व शेयर बजारमा रौनक देखिएको छ । प्रचण्ड नेतृत्वको वर्तमान सरकारलाई विदाई गर्न आतुर लगानीकर्ता नयाँ सत्ता समीकरणप्रति आशावादी देखिएसँगै क्यापिटल मार्केट उचालिएको हो ।

साताको अन्तिम कारोबारको भोलिपल्ट शुक्रबार प्रधानमन्त्री प्रचण्डले प्रतिनिधि सभामा विश्वासको मत लिने तयारी गर्नु भएको छ । दुई ठूला राजनीतिक शक्ति कांग्रेस र एमालेबीचको नयाँ समीकरणलाई अन्य दलसमेतले समर्थन गरी प्रचण्डलाई विश्वासको मत नदिने घोषणा गरेकाले वर्तमान सरकारको वहिर्गमन निश्चित प्रायः छ । लगानीकर्ताले रुचाएका विष्णु पौडेल अर्थमन्त्री बन्ने चर्चाले समेत लगानीकर्ता उत्साही भएका हुन् ।

साताको अन्तिम कारोबार दिन बिहीबार नेपाल स्टक एक्सचेञ्ज (नेप्से) २९.२१ अकंले बढेर २२०४.६१ बिन्दुमा उक्लियो । यस दिन ३३१ कम्पनीको २ करोड ४८ हजार १२३ कित्ता शेयर किनबेच हुँदा ६ अर्ब ९८ करोड १८ लाख ४७ हजार रुपैयाँको कारोबार भएको छ।

बिहीबार १२ उपसूचक हरियाली छायो । यसदिन बैंकिङ समूहको २.४२ प्रतिशत, विकास बैंक समूहको ०.१७ प्रतिशत, फाइनान्स समूहको ०.३० प्रतिशत, होटल तथा पर्यटन समूहको ०.६० प्रतिशतले शेयर मूल्य बढेको हो । यसदिन दुई कम्पनीको शेयरमा सकारात्मक सर्किट लागेको छ ।

प्रकाशित मिति: बिहीबार, असार २७, २०८१ १५:१८