साउन देखि श्रमिकको न्यूनतम पारिश्रमिक वृद्धि, राजपत्रमा घोषणा

अर्थ

गृहपृष्ठ
अर्थ

साउन देखि श्रमिकको न्यूनतम पारिश्रमिक वृद्धि, राजपत्रमा घोषणा न्यूनतम पारिश्रमिक वृद्धि

नेपालकभर मंगलबार, साउन ७, २०८२

काठमाडौँ, साउन — श्रमिकका लागि न्यूनतम पारिश्रमिक बढाएर अब मासिक रु १९ हजार ५५० कायम गरिएको छ। त्रिपक्षीय सहमतिअनुसार गरिएको यो निर्णय सोमबार नेपाल सरकारको राजपत्रमा प्रकाशित भएको हो।

गत असार ३२ गते श्रम, रोजगार तथा सामाजिक सुरक्षा मन्त्रालयमा सरकार, रोजगारदाता, र श्रमिक संगठनबीच भएको बैठकले आगामी दुई वर्षका लागि यो नयाँ पारिश्रमिक दर सिफारिस गरेको थियो। श्रम ऐन, २०७४ को दफा १०७ अनुसार हरेक दुई वर्षमा न्यूनतम पारिश्रमिक पुनःनिर्धारण गर्नुपर्ने प्रावधान अनुरूप यो निर्णय गरिएको हो।

यो निर्णय पहिलोपटक त्रिपक्षीय सहमतिका आधारमा गरिएको हो। श्रममन्त्री शरतसिंह भण्डारीले न्यूनतम पारिश्रमिक तोक्नु मात्र पर्याप्त नभई त्यसको प्रभावकारी कार्यान्वयनमा सबै पक्षले जिम्मेवारीपूर्वक लाग्नुपर्ने धारणा राखे।

समितिका संयोजक तथा श्रम मन्त्रालयका सहसचिव प्रदीप कोइरालाले लामो छलफल र समन्वयपछि सबै पक्षको सहमति जुट्न सफल भएको जानकारी दिए। उद्योग वाणिज्य महासंघका अध्यक्ष चन्द्र ढकालले पनि दिगो श्रम सम्बन्ध कायम राख्न न्यूनतम पारिश्रमिकमा सहमति आवश्यक रहेको उल्लेख गर्दै सबै पक्षको लचकता र सहकार्यलाई प्रशंसा गरे।

यसअघि श्रमिकको न्यूनतम पारिश्रमिक रु १७ हजार ३०० थियो।

प्रकाशित मिति: मंगलबार, साउन ७, २०८२ १४:१६