नर्वेले सञ्चालनमा ल्यायो गुड्दा–गुड्दै चार्ज हुने सडक, विद्युतीय यातायातमा क्रान्तिकारी प्रयोग

अर्थ

गृहपृष्ठ
अर्थ

विद्युतीय चुम्बकीय प्रणाली नर्वेले सञ्चालनमा ल्यायो गुड्दा–गुड्दै चार्ज हुने सडक, विद्युतीय यातायातमा क्रान्तिकारी प्रयोग विद्युतीय यातायातमा क्रान्तिकारी

नेपालकभर मंगलबार, साउन २८, २०८२

काठमाडौँ, साउन । विद्युतीय सवारी साधन (इभी) को प्रयोगलाई बढावा दिने लक्ष्यसहित नर्वेले गाडी गुड्दा–गुड्दै चार्ज हुने अत्याधुनिक ताररहित सडक निर्माण गरी विश्वभरको ध्यान तानेको छ।

सन् २०२५ भित्र पेट्रोल र डिजेलबाट चल्ने सवारी साधन हटाउने योजना अघि सारेको नर्वेले ट्रन्डहाइम सहरमा परीक्षणका लागि करिब १०० मिटर लामो ‘वायरलेस चार्जिङ’ सडक निर्माण गरेको हो।

विद्युतीय चुम्बकीय प्रणाली प्रयोग
बेलायतको हाइवेज इन्डस्ट्रिज डटकम का अनुसार, उक्त सडकमा तामाका क्वाइल जडान गरिएको छ, जसले विद्युत चुम्बकीय क्षेत्र सिर्जना गरी विशेष रिसिभर जडित बसमा ऊर्जा प्रवाह गर्छ। यस प्रविधिबाट गाडीहरू स्थिर नराखीकन चलिरहेको अवस्थामा नै चार्ज हुने सुविधा पाउँछन्।

सार्वजनिक यातायातमा प्राथमिकता
हाल यो परियोजना सार्वजनिक यातायात अन्तर्गत प्रयोग हुने विद्युतीय बसहरूका लागि परीक्षणरत छ। चिनियाँ कम्पनी युतोङ र हाइगरका बसहरू प्रयोगमा ल्याइएको छ। लामो दूरी चल्ने बसहरूलाई चार्ज गर्न थुप्रै घण्टा रोकिनुपर्ने झन्झट हटाउने उद्देश्यले यो प्रविधि ल्याइएको नर्वेले जनाएको छ।

हिउँदमा परीक्षण, दीर्घकालीन योजना
सधैँजसो चिसो मौसम रहने ट्रन्डहाइम सहरमा हिउँदको अवस्थामा पनि प्रणालीले असर गर्छ कि गर्दैन भन्ने परीक्षण भइरहेको छ। परीक्षण सफल भए सन् २०२९ सम्म यस्ता दर्जनौं नयाँ बसहरू खरिद गरिने ट्रन्डलाग काउन्टी काउन्सिलका यातायात निर्देशक कोनराड प्यूट्जले जानकारी दिएका छन्।

सरकारको २.१२ मिलियन डलरको लगानी
परियोजनाको लागत करिब २ करोड २४ लाख नर्वेजियन क्रोन (२.१२ मिलियन अमेरिकी डलर) रहेको छ। यो प्रविधिको सफलताले ब्याट्री सानो बनाउन, गाडीको लागत घटाउन र चार्जिङ स्टेसनको निर्भरता घटाउन सहयोग पुग्ने अपेक्षा गरिएको छ।

प्रविधि नवीन भए पनि खर्चिलो
तर, यो प्रविधि लागतका हिसाबले भने निकै खर्चिलो छ। परीक्षणका लागि निर्माण गरिएको एक सय मिटर सडकमै करोडौँ खर्च भइसकेको छ। दीर्घकालीन विश्वसनीयता र मर्मतको पक्षमा अझै प्रश्न उठिरहेको हाइवेज इन्डस्ट्रिजको रिपोर्टमा उल्लेख छ।

नयाँ सम्भावनाको ढोका खोल्ने प्रयास
विद्युतीय यातायातमा अग्रणी मानिने नर्वेले विद्युतीय सवारी साधनलाई व्यवहारिक र दिगो बनाउने उद्देश्यले यो साहसी कदम चालेको हो। विज्ञहरूले यसलाई ‘भविष्यतर्फको ठुलो छलाङ’ भनेर व्याख्या गरेका छन्।

यदि सफल भयो भने, नर्वेको यो परियोजनाले अन्य मुलुकहरूलाई पनि हरित यातायातका क्षेत्रमा नवीनतम समाधान अपनाउन प्रेरणा दिने विश्वास गरिएको छ।

प्रकाशित मिति: मंगलबार, साउन २८, २०८२ ०७:४०